Det blir undervist i emnet kvart haustsemester.
Undervisninga har tre mål: Studenten skal lære historiefagets historisitet å kjenna, gjennom å studere kva samfunnsforståing, teoriar og metodar som i ulike fasar har prega historieforskinga. Studenten skal få ei innføring i sentrale teoriar om samfunnet og korleis det forandrar seg, med stor vekt på å diskutere forholdet mellom strukturar og aktørar, økonomi og kultur og ulike former for forklaringar. Studenten skal lære seg nokre av dei mest sentrale historiske metodane, og dei skal kunne bruke eit variert utval av kjeldemateriale frå ulike historiske periodar.
Kunnskapar
Studenten kjenner til hovudlinjer i korleis historiefaget har endra seg både internasjonalt og i Noreg. Studenten har kunnskap om kva skiftande tilhøve fag og samfunn har stått i til kvarandre, og korleis ulike teoretiske og metodiske tilnærmingar i ulike periodar har prega faget og diskusjonar om faget.
Ferdigheiter
Studenten kan plassere historiske arbeid i ein historiografisk og historisk kontekst, relatere seg til eit utval teoriar om samfunnsmessig endring, og meistrar eit utval av metodiske tilnærmingar til studiet av fortida.
Generell kompetanse
Studenten har kompetanse i korleis historiefaget har blitt forstått og praktisert. Studenten er i stand til å kontekstualisere og historisere både fortida og forsking om fortida, til teoretisk refleksjon, og til å vurdere tilhøvet mellom spørsmål og val av metode.