Bachelor

Undervisninga startar i haustsemesteret og går over to semester.

Ole Bull Akademiet, Voss. Høve til noko undervisning hjå felemakarar andre stader.

Emnet er eit tilbod til studentar som tek fordjuping i hardingfelebygging som del av studiet. For slike studentar utgjer emnet, saman med MOB230 Folkemusikkutøving 3 og MOB208 Hardingfelebygging 2, heile tredjeårsstudiet.

Emnet skal gi studenten eit godt grunnlag i utføring av hardingfeledekor, og å stimulere kreative evner innanfor dekor- og kunsttradisjonar der hardingfela høyrer heime.

Emnet omfattar:

• Dekor: Hovud (formgjeving/utskjering), innlegg av perlemor/bein, roseteikning ¿ ulike mønstertradisjonar
• To- og tredimensjonal forming, ornamentikk: Kopiering, frie oppgåver i ulike material. Geometrisk/organisk, symmetrisk/asymmetrisk ornamentikk.
• Teknikkar: Bruk av skjereverktøy, penn/pensel, fargeteknikkar, forgylling
• Stilartar i treskjering og folkekunst: Karveskurd, akantus, rosemåling, drakestil

Studentar som har fullført emnet skal ha følgjande læringsutbyte:

Kunnskapar:

Studenten skal ha kunnskap om material- og verktøybruk som er relevant for hardingfeledekor, og om bruk av dekor både i hardingfeletradisjonen, annan folkekunst og meir generelt.

Ferdigheiter:

Studenten skal kunne skjere eit hardingfelehovud med godt resultat, kopiere tradisjonell hardingfeledekor, både to- og tredimensjonal, og leggje inn perlemor og bein på instrument på tradisjonell måte.

Generell kompetanse:

Studenten skal vise evne til å ta sjølvstendige faglege val med bakgrunn i rettleiing og kunstnarlege føredøme.

Emnet er normalt eit tilbod til studentar som har gjennomført 2. studieår av bachelorstudiet i tradisjonsmusikk ved Ole Bull Akademiet, med fordjuping i felebygging som inkluderer emna MOB109 Hardingfelebygging 1 og MOB110 Felemakarhistorie.

Studenten arbeider under rettleiing av hardingfelemakar. Dersom det ligg til rette for det, kan studenten få noko tilleggsundervisning hjå spesialist i treskjering/folkekunst. Det er førelesingar/seminar om utvalde emne, og besøk ved instrumentsamlingar.

Det skal leverast inn eit ferdig skore hardingfelehovud. Hovudet kan vere montert på hardingfela som blir levert i MOB208 Hardingfelebygging 2, eller leverast separat. Estetisk og funksjonell form blir vurdert. Intern sensur med minst to sensorar.

Ved sensur av emnet blir karakterskalaen greidd/ikkje greidd nytta.

Evaluering blir gjennomført i tråd med Universitetet i Bergen sitt kvalitetssikringssystem.

Griegakademiet - Institutt for musikk.

For meir informasjon, ta kontakt med Ole Bull Akademiet, 56 51 65 00, oba@olebull.no.