Undervisninga startar i haustsemesteret og går over 2 semester.

 Emnet gjev ein introduksjon til musikkterapi i habilitering og medisinske kontekstar og inneheld tre hovudkomponentar: Musikkterapi i habilitering, Musikkterapi i medisinske kontekstar og Relasjons- og kommunikasjonserfaringsgruppe. Praksis inngår i emnet.

Musikkterapi i habilitering

Kurset gjev ei teoretisk og praktisk-metodisk innføring i musikkterapi innanfor habilitering og tverrfagleg arbeid, med særleg vekt på barn i forskjellige settingar. Ulike tilnærmingar og arbeidsmåtar blir presenterte og det blir gitt eksempel på forskjellige typar arbeid og over sentral forsking på feltet. Studietilbodet skal kvalifisere studentane teoretisk og praktisk-metodisk for musikkterapeutisk praksis innan habilitering, med vekt på medfødde og erverva funksjonshemmingar og kronisk sjukdom. Temaet førebyggjande arbeid i høve til sosiale og emosjonelle problem vil også bli handsama. Det blir lagt vekt på tilbod og arbeidsmåtar som gjev rom for brukarperspektiv og samordna og tverrfagleg arbeid i ein for brukaren meiningsfull samanheng nærast mogeleg det daglege miljøet.

 Musikkterapi i medisinske kontekstar

Kurset gjev ei teoretisk og praktisk-metodisk innføring i musikkterapi innanfor nevrorehabilitering og medisinske kontekstar, med særleg vekt på vaksne pasientar men også med presentasjon av arbeid med barn og nyfødde. Ulike tilnærmingar og arbeidsmåtar blir presenterte og det blir gitt eksempel på forskjellige typar arbeid og over sentral forsking på feltet. Studietilbodet skal kvalifisere studentane teoretisk og praktisk-metodisk for musikkterapeutisk praksis innan nevrorehabilitering og medisinske kontekstar.

Relasjons- og kommunikasjonserfaringsgruppe

Kurset byggjer vidare på tilsvarande kurs på MUTP201 og MUTP202 og gjev studentane høve til å arbeide vidare med kommunikativ kompetanse i arbeid med menneske, i relasjon til ei grundigare forståing av kva som ligg i terapeutisk identitet og rolle. Kurset gjev rom for erfaring med og arbeid med gruppeprosessar og med personlege prosessar knytt til erfaringar i undervisning og praksis ved studiet.

Læringsmål

Gjennom arbeid med dei ulike delemna skal studenten utvikle den dugleiken og dei haldningar og kunnskapar som er nødvendige for utøving av musikkterapi habilitering, nevrorehabilitering og medisinske kontekstar. Emnet skal stimulere til personleg utvikling med vekt på refleksjon og samarbeid.

Opptak til 300-nivået av det integrerte masterprogrammet i musikkterapi.

Undervisninga blir lagt opp med varierte undervisningsformer med tanke på integrasjon av teoretisk og praktisk-metodisk kunnskapsstoff, og vil inkludere førelesingar, gruppearbeid, diskusjonar og dessutan ei verkstadsform med fokus på å tileigne seg, prøve ut, få rettleiing på og vidareutvikle praktisk-metodisk dugleik.

Praksis kan skje både på dagtid, kveldstid og helger, eller i samband med framføringar, prosjekt, osb. Praksis vil ha kontinuerlig rettleiing. Det skal skrivast ein kort praksisrapport frå kvar praksisperiode.

Seminar med Relasjons- og kommunikasjonserfaring inngår i emnet.

All undervisning er obligatorisk. Kurset i Musikkterapi i habilitering omfattar eit teoretisk kurs i utviklingspsykologi og i habilitering, kombinert med eit teoretisk og praktisk-metodisk kurs i musikkterapi og habilitering. Kurset i Musikkterapi i medisinske kontekstar omfattar eitt teoretisk kurs i nevrorehabilitering kombinert med eit teoretisk og praktisk-metodisk kurs i musikkterapi innan nevrorehabilitering og medisinske kontekstar. I tillegg kjem Relasjons- og kommunikasjonsseminar og Praksis. Det blir gitt munnlege og skriftlege oppgåver undervegs i semesteret. Ei praktisk-metodisk arbeidsbok skal utarbeidast. Det er ein føresetnad at alle obligatoriske aktivitetar er gjennomførte og godkjende før eksamen.

Studentar i 7. og 8. semester tar punktpraksis og blokkpraksis under rettleiing av musikkterapeut. Fagleg må praksisen gjerne vere knytt til habilitering, nevrorehabilitering og medisinske kontekstar, men praksis knytt til psykisk helsearbeid og eldreomsorg vil også vere relevant og det er dessutan mogeleg for studentane å ta delar av denne praksisen innan pedagogiske eller samfunnsorienterte kontekstar. Det er forventa at ein av dei to praksisplassane i 7. og 8. semester skal vere innan helsesektoren (t.d. sjukehus, sjukeheim eller psykisk helsevern).

Studentar i 9. og 10. har sjølvstendig praksis med rettleiing frå studiet. Studenten har sjølv ansvar for å finne praksisplass for det siste året av det integrerte masterprogrammet. Som hovudregel skal den sjølvstendige praksisen vere innan eit felt der studenten tidlegare har hatt ordinær praksis.

Mappeeksamen basert på kortare skriftlege arbeid gjennom semesteret. Den innleverte mappa skal innehalde ein praksisrapport, eit observasjons- eller refleksjonsnotat frå praksis og ein kommentert musikkterapeutisk song eller aktivitet som studenten sjølv har arrangert eller komponert.

Kommentaren til den musikkterapeutiske songen/aktiviteten skal grunngje musikalske val utifrå terapeutiske målsetjingar. Denne kommentaren kan vere kort, gjerne på ei side eller to, medan praksisrapport og observasjons-/refleksjonsnotat begge skal vere på ca. 1500 ord, 4-5 s med linjeavstand halvannan, margar 2,5 cm og Times New Roman 12 som skrifttype. Litteraturliste og vedlegg kjem i tillegg. Når to eller fleire studentar skriv oppgåve i saman, blir omfanget utvida med 2/3 for kvar ny medforfattar.

Intern sensur. Vurderingsuttrykk: Greidd/Ikkje greidd.

Pensum er på ca. 800 s. Eiga pensumliste blir utarbeidd.

Det blir gjennomført evaluering i form av spørjeskjema. Ein skriftleg rapport blir utarbeidd.