Norsk
Undervisninga startar i haustsemesteret og går over to semester.
Emnet skal førebu studentane på å gjere teneste som kantor/organist i Den norske kyrkja. Gjennom studiet skal studentane tileigne seg praktiske kunnskapar i gudstenestleg orgelspel med sikte på å leie kyrkjelydssongen og gjere gudstenesta kunstnarleg rikare.
Studenten i fullført emne
- kan førebu og gjennomføre liturgiske tenester som kantor/organist,
- kan på eige hand finne og velje eigna musikk,
- kan innstudere musikken på avgrensa tid,
- kan meistre uventa situasjonar i ei gudsteneste,
- kan utnytte dei klanglege ressursane i orgelet.
Emnet er normalt eit tilbod til studentar som har gjennomført 2. studieår på bachelorprogram i utøvande musikk eller komposisjon med orgel som hovudinstrument. Søkjarar med anna hovudinstrument (til dømes piano eller song) kan godkjennast dersom tilstrekkeleg ferdigheit i orgelspel kan dokumenterast ved opptaksprøve.
Bachelorprogram i utøvande musikk eller komposisjon.
Det viktigaste undervisningsmaterialet er gudstenesteordningane til Den norske kyrkja, gjeldande salme- og koralbøker, liturgisk musikk, forspelsamlingar og musikk til kyrkjelege handlingar.
Det vert arbeidd med:
- teknikk, rytme, frasering osv. i koralspel, inkludert spel med framheva melodi i sopran og tenor
- dei liturgiske ledda og deira funksjonelle samanheng
- val, utarbeiding og framføring av koralforspel og følgjesatsar
- spel ved ulike gudstenestetypar og kyrkjelege handlingar
- val av høveleg musikk til liturgisk bruk
- liturgisk resitativ og bibelske salmar
- transponering av koralar og dei faste liturgiske songane.
Delta i gruppeundervisning og øvingsgudstenester.
All undervisning er obligatorisk. Fråvær på meir enn 20% fører til tap av eksamensrett.Det er ein føresetnad at alle obligatoriske arbeidskrav er gjennomført og godkjent før eksamen.
Godkjente obligatoriske arbeidskrav er gyldig i to semester etter gjennomføring.
Praktisk prøve i liturgisk orgelspel som skal gjennomførast som ei fullstendig høgmesse. Koralspelet skal varierast, og minst éin koral skal utførast med framheva melodi. Oppgåva blir utlevert tre dagar før eksamen (eventuelle sundagar/heilagdagar kjem i tillegg til vanleg førebuingstid). Instituttet skaffar liturg. Alternativ liturg må godkjennast på førehand. Kandidaten skaffar sjølv forsongarar, men kan ikkje nytte registrant.
Ekstern sensur med ein ekstern sensor og til saman minst to sensorar. Ein av desse kan vere faglærar.
Bokstavkarakterar frå A til F.
Emnet erstatter delvis MUV2074 Liturgisk teori og praksis.
Undervisninga blir evaluert i tråd med Universitetet i Bergen sitt kvalitetssikringssystem
Griegakademiet - Institutt for musikk. E-post: studierettleiar@grieg.uib.no