Haustsemesteret.

Bergen

Emnet har som tema litteratur og litteraturpedagogikk og tekstlingvistikk og pragmatikk i eit andrespråksperspektiv. Emnet fell såleis naturleg i to delar, ein språkleg og ein litterær del, men det er viktige sambandsliner mellom dei to delane.

Medan emna NORAN101(-F), og 104(-F) hovudsakleg er fokusert på grammatiske, leksikalske og fonologiske tilhøve og innlæringa av desse mikronivåa i språket, skal ein i NORAN115 utvide den språklege og språkpedagogiske horisonten til større språklege einingar som har med tekst og litteratur å gjere.

Slik innsikt er for det første naudsynt fordi tekstnivået reint formelt representerer eit konvensjonsstyrt makrosystem som er uavhengig av, men har sterke sambandsliner til, mikronivåa og er ein viktig del av den overordna totale språklege kompetansen. Ettersom både munnleg og skriftleg språkbruk må forståast som del av ein språkleg og utanomspråkleg kontekst, vil studenten få ei innføring i tekstlingvistikk og pragmatikk relatert både til talespråk og skriftspråk. Innføringa skal ha ei viss teoretisk breidd, og stoffet skal setjast inn i ein andrespråksdidaktisk samanheng.

Den andre halvdelen av emnet er litterær. Den litteraturen som er formidla på andrespråket, er ein uvurderleg innfallsport til forståing av den kulturelle referanseramma for språket. Samstundes er litteraturen eit didaktisk verkemiddel i språkundervisninga. Men litteraturen har ikkje minst ein eigenverdi, i andrespråks- liksom andre samanhengar. Den litterære delen gjev difor ei innføring i litteratur og litteraturpedagogikk ut frå dei spesielle føresetnader og utfordringar som undervisning i norsk som andrespråk har.

Dei litterære tekstane på pensumet skal for det første skal pensum representere eit tverrsnitt av sentrale tekstar frå norsk litteraturhistorie. For det andre skal pensumet innehalde verk som handlar om emne som migrasjon, kulturmøte og liv i fleirspråklege og fleirkulturelle miljø.

Tekstane skal representere spreiing på litterære genrar. Også verk av forfattarar med minoritetsspråkleg bakgrunn skal vera representerte. Hovudtyngda av tekstane skal vere opphavleg norskspråklege, men tekstar omsette til norsk skal også vere representerte. I tilknyting til dei litterære tekstane legg studentane opp eit teoripensum som set tekstane inn i ein litteraturhistorisk, litteraturteoretisk og litteraturdidaktisk samanheng. Teoretiske perspektiv som set tekstane inn i eit allmennlitterært, kontrastivt og tverrkulturelt lys som speglar norsk litteratur, vert prioritererte, og generell litteraturdidaktikk for minoritetsspråklege skal også vere representert.

Litteraturdidaktikk for minoritetsspråklege i grunnskulen og den vidaregåande skulen dannar elles både den teoretiske og den praktiske hovudinnfallsvinkelen til utvalet og studiet av tekstane.

Ingen

Undervisningstype og -mengd:

Førelesingar 4 timar i veka i om lag 13 veker.

Studentkollokvium med sporadisk lærartilsyn: 2 timar i veka. 

Om det melder seg færre enn fem studentar til eit emne, kan instituttet innføre redusert undervisning, jamfør instituttets retningslinjer for dette på Mi side. På emne der dette kan verte aktuelt, vil studentane få informasjon om det ved semesterstart og før semesterregistreringsfristen 1. februar/1. september.

Det er obligatorisk å levere utkast til mappeoppgåvene og å motta rettleiing på dei. Instituttet gjev nærare retningslinjer.

Obligatorisk aktivitet er gyldig i undervisningssemesteret og semesteret etter.

Eksamen er ei skriftleg prøve på fire timar og ei mappe med to oppgåver, ei språkleg og ei litterær. Den skriftlege prøva tel 60 % og mappa 40 % av den samla karakteren.

Ein må stå på alle delane for å stå på heile eksamen. Både den skriftlege prøva til eksamen og mappeoppgåvene skal skrivast på norsk. Éi mappeoppgåve skal skrivast på bokmål og éi på nynorsk. På den skriftlege prøva vel studenten målform sjølv.

Det vert arrangert eksamen tidleg i det undervisningsfrie semesteret. Kandidatar som stod på berre den skriftlege prøva eller mappa, kan ta eksamen i den andre delen. I mappa inngår oppgåvene frå undervisningssemesteret; kandidaten har høve til å forbetre dei, men kan ikkje få rettleiing.

Ved fastsetjinga av karakter vert det lagt vekt på både fagleg kunnskap, sjølvstendig og kritisk vurdering, evne til problemløysing og språkføring.

Det vert nytta bokstavkarakterar frå A til F, der F er stryk.

Pensumet er på ca. 1000 sider av normal vanskegrad og vert fastsett av instituttet.

Emneevalueringar vert gjennomførte i tråd med UiB sitt kvalitetssikringssystem.

Institutt for lingvistiske, litterære og estetiske studium

E-post: studierettleiar@lle.uib.no