Emnet gir kunnskapar om sentrale delar av spanskamerikansk litteratur med hovudvekt på det 20. hundreåret og etter kvart det 21. hundreåret. Kurset skal gi studentane eit breitt overblikk over moderne spanskamerikansk litteratur. 

Studiet skal gi studentane eit oversyn over hovudtendensar i spanskamerikansk litteratur frå 1492 og fram til i dag. Studentane skal arbeida med eit representativt utval tekstar frå ulike nasjonallitteraturar, genrar og epokar, og utvikla ei analytisk forståing for eigenarten ved tekstane. Studiet skal gi innsyn i sentrale tema og problemstillingar innan spanskamerikansk litteratur. Studentane skal analysera fagstoff og trekkja eigne slutningar. Dei skal kunna vidareutvikla kunnskap, dugleik og forståing gjennom vidare studium og yrkesliv.

• ha kunnskap om representative tekstar, sjangrar og straumdrag innan spanskamerikansk litteratur frå det 19. hundreåret og fram til i dag
• ha tileigna seg grunnleggjande tekstanalyse og ha utvikla evne til å lesa og tolka moderne litterære verk på spansk
• ha utvikla evnen til å uttrykkja seg skriftleg og munnleg på spansk, både om litteraturfaglege emne og meir ålment

Undervisninga er bygd opp av førelesingsrekkjer hovudsakleg på spansk, der pensumtekstane blir kommenterte. Det blir lagt vekt både på den litteraturhistoriske konteksten og på dei formelle og tematiske kvalitetane ved tekstane. Det blir dessutan arbeidd i mindre grupper med språk, innhald og andre sider ved pensumtekstane.

Det blir gitt førelesingar seks timar i veka i 12 veker. I tillegg blir det normalt gitt gruppeundervisning med fokus på tekstanalyse og skrivedugleik to timar i veka i fire veker om ressursane tillèt det.

Det er tre obligatoriske oppgåver: eit kort samandrag av ein litterær tekst, ei innleiing til eit litteraturessay og ein tekstkommentar. Desse må utførast innan fristen for den enkelte aktivitet. Vurderingsforma er godkjent/ikkje godkjent.

I samsvar med UiB sitt grads- og studiereglement har studentane høve til å få eit nytt forsøk per oppgåve om ei eller fleire av dei ikkje vart godkjende ved fyrste innlevering. Alle dei tre aktivitetane må vera godkjende før ein kan gå opp til vurdering i emnet.

Vurderingsforma er ein 6-timars skoleeksamen som blir skriven på spansk. Karakteren blir sett på grunnlag av både innhald og språk.

Studentane kan nytta eittspråkleg og tospråkleg (t.d. norsk-spansk/spansk-norsk) ordbok godkjend av instituttet på eksamensdagen. Studentane må sjølve ta med ordbøker til eksamen, og halda seg orienterte om og retta seg etter reglane som gjeld for kontroll av ordbøkene.