Emner: SPLA251 Fordypning i spansk språk med bacheloroppgave - Høst 2014

Studienivå (studiesyklus)

Bachelor

Undervisningsspråk

Spansk

Undervisningssemester

Vår

Undervisningsstad

Bergen

Mål og innhald

SPLA251 er eit fordjupingsemne i spansk språk på 15 studiepoeng. Grammatikk, med særleg vekt på latinamerikanske variantar, blir gitt kvart undervisningssemester. Semantikk, pragmatikk, dialektologi, målsoge eller omsetjingsteori vil rullera mellom dei ulike semestra.

Læringsutbyte

Ved fullført emne skal studenten

ha gode kunnskapar i spansk, samt djupare innsikt i nokre utvalde emne relaterte til spansk grammatikk (morfologi, syntaks og pragmatikk).
vera i stand til å analysera spansk språkstruktur og gjera greie for spanske grammatiske emne.
ha fått djupare innsikt i språkvitskapleg teori og metode.
ha kunnskap om ulike variantar innanfor spansk språk.

Krav til forkunnskapar

Ingen formelle krav, men all undervisninga skjer på spansk og baserer seg på spanskkunnskapar som svarar til emna på 100-nivå i spansk språk og latinamerikastudium.

Tilrådde forkunnskapar

SPLA251 baserer seg på spanskkunnskapar som svarar til emna på 100-nivå i spansk språk og latinamerikastudium. Undervisninga byggjer vidare på SPLA101.

Krav til studierett

Emnet er ope for alle med studierett ved UiB.

Undervisningsformer og omfang av organisert undervisning

Undervisninga er samansett av førelesingar, seminar og gruppeøvingar. Det blir gitt grammatikkførelesingar to timar i veka i 12 veker, førelesingar i El español de América to timar i veka i 12 veker og gruppeøvingar to timar i veka i seks veker. Studentane lyt ta aktivt del i seminara og gruppeøvingane, mellom anna med skriftlege oppgåver og munnlege innleiingar. Undervisninga går saman med SPLA201.

Obligatorisk undervisningsaktivitet

Den rettleidde bacheloroppgåva som blir omtala under Vurderingsformer skal leverast til rettleiing i løpet av semesteret, innan oppsette fristar. Fristane er endelege, og studentane pliktar sjølve å halda seg informerte om desse. Det er òg obligatorisk for studentane å møta til rettleiing til avtala tidspunkt. Det blir sett opp to rettleiingstimar etter avtale mellom student og rettleiar. Rettleiing per e-post/tlf. blir normalt ikkje gitt.

Vurderingsformer

Ei rettleidd bacheloroppgåve og munnleg eksamen. Oppgåva skal vera på om lag 12 standardsider (dobbel linjeavstand og 12 punkt Times New Roman eller liknande skrifttype) pluss bibliografi, skriven på spansk. Munnleg eksamen er ein samtale på spansk om det pensum frå SPLA251 ein ikkje har skrive oppgåve i (Grammatikk/El español de América), der òg oppgåva kan trekkjast inn. Samtalen varer i om lag 20 minutt.

To studentar kan velja å gå saman om å skriva éi oppgåve, og oppgåva skal i så fall vera på 15 standardsider (dobbel linjeavstand og 12 punkt Times New Roman eller liknande skrifttype) pluss bibliografi, skriven på spansk. Det blir gitt ein felles karakter på oppgåva, men studentane får individuell munnleg eksamen.

Den rettleidde oppgåva og den munnlege delen av eksamen tel båe 50 prosent. Stryk i ein av desse delane fører til stryk i SPLA251. Båe eksamensdelane må vere greidde i same semester.

Vurderingsforma rettleidd bacheloroppgåve med munnleg eksamen fyller kravet til det sjølvstendige arbeidet som skal gå inn i ein bachelorgrad. Dei som vel to av spanskemna på 200-nivå, kan maksimalt velja eitt av oppgåveemna med 250-kode i same semester.

Karakterskala

Ved sensur av emnet nyttar ein karakterskalaen A-F, der F er stryk.

Fagleg overlapp

SPLA201(100 %), SLAN640

Litteraturliste

Fast pensum er 150 sider frå ei spansk grammatikkbok, og 50 sider frå boka El español de América. I tillegg kjem om lag 100 sider lingvistiske artiklar som tilrådd støttelitteratur. Det varierande pensumet blir sett opp av faglærar og er på 100 sider. Totalt er pensum på kring 400 sider.

Emneevaluering

Undervisninga blir evaluert i tråd med UiB sitt kvalitetssikringssystem.

Kontaktinformasjon

studieveileder@if.uib.no