Norsk

Emnet har som mål å gi studenten teoretiske perspektiv på, og praktiske øvingar med, levande bilde og lyden sine ekspressive eigenskapar. Emnet har tre modular.

Modul 1 er teoretisk, og gir ei innføring i korleis filmskaparar på byrjinga av 1900-talet utvikla filmspråklege konvensjonar som orienterte publikum i tid og rom, og som danna grunnlaget for den klassiske Hollywoodfilmen, som representerer den vanlegaste måten å setje saman audiovisuelle forteljingar på. I den historisk retta delen av emnet lærer studenten også om alternative filmtradisjonar, samt om estetikken i ulike typar tv-fiksjon. I tillegg skal studenten gjennom førelesingar og seminar få kunnskap om handverksmessige prinsipp og audiovisuelle verkemiddel. Til denne undervisinga høyrer også praktiske øvingar med tilbakemelding frå staben som sikrar at studenten får prøve ut, og reflektere over, dei historiske og teoretiske perspektiva.

Dei to andre modulane er praktisk retta:

Modul 2: består av tre øvingsoppgåver med tilhøyrande teknisk opplæring.

Modul 3: består av ein produksjon der studentane skal anvenda kunnskapen og ferdigheitene dei har tileigna seg i modul 2 i praksis.

Studenten skal ved avslutta emne ha følgjande læringsutbyte:

Kunnskap:

Studenten

• har kunnskap om framveksten og utviklinga av filmspråklege konvensjonar
• har brei kunnskap om alternative filmtradisjonar, og kan setje dei inn i relevante faglege og historiske samanhengar
• kan gjere greie for og drøfte analytisk dei stilistiske konvensjonane som kjenneteiknar ulike typar tv-fiksjon (situasjonskomedie, dramaseriar, skilnaden på einkamera- og fleirkameraproduksjonar)

Ferdigheiter:

Studenten

• har historisk og teoretisk kunnskap om ulike handverksmessige oppgåver og audiovisuelle verkemiddel, samt deira ekspressive potensial og formidlingsmessige funksjonar i film- og tv-produksjon
• skal gjennom praktiske øvingar og tilbakemeldingar frå fagleg stab kunne innlemme og utnytte dei akademiske perspektiva på mise-en-scene, kamerarørsler, kameravinklar, bildeutsnitt, dybdeskarpheit, aksebrot, produksjonsdesign, lyddesign, klipping og lyssetjing (i studio og utandørs) i eigen praksis

Generell kompetanse:

Studenten

• har innsikt i relevante teoretiske og praktiske problemstillingar innan fagområda levande bilete og lydens ekspressive eigenskapar
• kan utveksle synspunkt og erfaringar med andre som har ein teoretisk og praktisk bakgrunn innanfor desse fagområda, og såleis bidra til å utvikle god praksis

Deltaking på teknisk opplæring i samband med øvingsoppgåver. Studentane vil få informasjon om datoar for dei obligatoriske aktivitetane ved semesterstart.

Tre praktiske øvingsoppgåver:

• Lydoppgåve: lage lyddesign til eksisterande scene frå film eller tv-serie (gruppevis)
• Klippoppgåve: setje saman to ulike scener frå eksisterande råmateriale (gruppevis)
• Foto/lys-oppgåve: filme/lyssetje to scener frå to ulike sjangrar (gruppevis)

Dei obligatoriske arbeidskrava må vere godkjende før studenten kan gå opp til eksamen.

Eksamen består av to delar:

1. Ein praktisk deleksamen: Ein gruppeproduksjon der studentane skal omsetja kunnskap og ferdigheiter innan lyd, klipp og foto/lys i praksis.
2. Ein teoretisk/analytisk deleksamen: Analyse av filmspråkleg verkemiddel i fritt vald film eller tv-serie. Analysen kan leverast anten som skriftleg oppgåve (4500 ord, pluss/minus 10%) eller som videoessay (10-15 minutt, med voiceover).

Det vert nytta bokstavkarakterar (A-F) i vurderinga av både produksjonen og det skriftelege arbeidet, som tel høvesvis 60% og 40% ved utrekning av samla karakter.

Institutt for informasjons- og medievitskap