Emnet skal gi auka kunnskap om og fordjupa innsikt i eitt eller to tema innan tysk språk/språkvitskap og/eller fagdidaktikk i eit språklæringsperspektiv. Kvart tema skal helst studerast i to eller fleire ulike framstillingar for å trene opp evna til sjølvstendig vurdering av lærestoff. Det skal òg gi dugleik og innsikt i vitskapleg arbeid og anna kunnskap dei treng for å arbeide med bacheloroppgåva, t. d. biblioteksressursar, siteringsteknikk og bruk av kjelder.

Studenten skal ved avslutta emne ha følgjande læringsutbytte definert i kunnskap, ferdigheiter og generell kompetanse:

Kunnskap
Studenten

• har brei, generell kunnskap om sentrale teoriar, omgrep og metodar innan tysk som forskingsfag
• har grunnleggjande kunnskap om dei sentrale problemstillingane og metodane i den valde disiplinen/dei valde disiplinane og djupare kunnskap innanfor eit avgrensa område
• har kjennskap til og kan bruke relevante kommunikative sjangrar

Ferdigheiter
Studenten

• kan utarbeide og presentere eit prosjekt på tysk (skriftleg og munnleg)
• kan reflektere over språklege nyansar mellom norsk og tysk og nyttiggjere seg det i munnleg og skriftleg bruk av tysk
• kan bruke eit presist språkvitskapleg omgrepsapparat på ulike teksttypar og problemstillingar i eige forskingsarbeid
• kan uttrykkja seg presist om faglege problemstillingar, analysar, tolkingar og konklusjonar innan eige fagområde
• kan arbeide sjølvstendig og langsiktig med problemløysing på grunnlag av tileigna faglege kunnskapar
• kan setje seg inn i og kritisk vurdere bruk av teoriar, metodar og tolkingar innanfor eige fagområde
• kan skaffe seg og nytta kunnskap på nye område innanfor faget

Generell kompetanse
Studenten

• kan uttrykke seg på tysk på høgt nivå både munnleg og skriftleg og kan lese avanserte tekstar på tysk
• kan finne fram til relevante kjelder og bibliografiar både på nettet og i oppslagsverk og bruke dei kritisk i eige arbeid
• kan gjennomføre eit avgrensa forskings- eller utviklingsprosjekt under rettleiing og i tråd med gjeldande forskingsetiske normer
• kan bruke dei metodar og analyseverkty som er naudsynte for å gjennomføre eit sjølvstendig forskingsarbeid innanfor eige fagområde
• kan halde fram med eiga kompetanseutvikling og spesialisering
• kan ta del i den offentlege debatten der denne rører ved fagområdet

Undervisinga skjer i form av forelesingar

• 4 timar i veka
• 12 veker (dvs. 12 dobbeltimar for kvart tema)

Om det melder seg få studentar til eit emne, kan undervisningsforma bli tilpassa studenttalet. Studentane vil i så fall bli informerte om det alternative undervisningsopplegget ved semesterstart og før semesterregistreringsfristen 1. februar/1. september.

I løpet av semesteret skal studentane skrive to øvingsoppgåver i tilknyting til undervisinga. Det skal òg haldast to munnlege presentasjonar på om lag 10 minutt. Studentane vel tema i samråd med faglærar.

Oppgåvene og presentasjonane må vere godkjende av faglærar for at studenten skal kunne gå opp til eksamen.

Godkjenninga av obligatoriske arbeidskrav er gyldig i undervisningssemesteret og semesteret etter.

Eksamen er ein 6 timars skriftleg skuleeksamen.

Eksamen kan bli digital.