Undervisninga startar i vårsemesteret (8. semester i normalprogresjonen).

Undervisninga skal gje innsikt i musikkterapiens vitskapsteoretiske fundament og ulike forskingstradisjonar innan faget og kurset inneheld fire hovudkomponentar: Introduksjon til musikkterapeutisk forsking; Kvalitative forskingsmetodar; Kvantitative forskingsmetodar; og Kasusstudiar, teoretiske undersøkingar og blanda metodar (mixed methods).

Introduksjon til musikkterapeutisk forsking

Kurset gjev eit oversyn over nokre sentrale problemfelt knytt til musikkterapeutisk forsking, og omfattar tema som: særlege kjenneteikn ved og utfordringar for musikkterapeutisk forsking, forskingstradisjonar i musikkterapifaget og vitskapsteoretiske posisjonar som har prega feltet.

Kvalitative forskingsmetodar

Kurset gjev ein introduksjon til kvalitativ forskingsmetode i musikkterapi, og omfattar tema som: eigenarten ved kvalitative metodar, kunnskapssyn og kvalitative forskingstradisjonar, problemstilling, undersøkingsopplegg og forskingsprosess, metodar for datainnsamling, analyse, tolking og teoriutvikling, formidling, samfunnsrelevans og kvalitet. Aksjonsforskingstradisjonen blir diskutert i relasjon til dette.

Kvantitative forskingsmetodar

Kurset gjev ein introduksjon til kvantitativ forskingsmetode, og omfattar tema som: konstruksjon og kvalitetstesting av intervjuskjema, spørjeskjema og skalaer, representativitet og randomisering, grunnleggjande omgrep i statistisk dataanalyse, sentrale metodar innan statistisk dataanalyse.

Kasusstudiar, teoretiske undersøkingar og blanda metodar (mixed methods)

Kurset gjev ein introduksjon til kasusstudiar, teoretiske undersøkingar og blanda metodar, med vekt på tema som: kasusstudium som design og metode, mogelegheiter for integrasjon av kvantitative og kvalitative forskingstilnærmingar og teoretisk vurdering og kritikk. Historisk forsking og ulike musikkorienterte tilnærmingar til musikkterapiforsking blir også diskutert i dette kurset.

Læringsmål

Gjennom arbeid med delemnet skal studenten utvikle kompetanse til å kunne forske i musikkterapi og til å vurdere forsking på feltet. Studenten skal utvikle evne til å kunne vurdere ulike forskingstradisjonar i musikkterapien i lys av vitskapsteori, vurdere relevante forskingsmetodar for eiga masteroppgåve og orientere seg i musikkterapifaget sin forskingslitteratur.

Opptak til 300-nivået av det integrerte masterprogrammet i musikkterapi. Unntak blir gjort for studentar på Forskingslinja.

Lærarstyrt undervisning, samarbeid i gruppe og sjølvstendig skriftlege arbeid.

All undervisning er obligatorisk og omfattar Introduksjon til musikkterapeutisk forsking, Kvalitative forskingsmetodar, Kvantitative forskingsmetodar, Kasusstudiar, teoretiske undersøkingar og blanda metodar (mixed methods) og Prosjektskisseseminar (1 t per student). Det blir gitt munnlege og skriftlege oppgåver undervegs i semesteret. Det er ein føresetnad at alle obligatoriske aktivitetar er gjennomførte og godkjende før eksamen. Fråvær på meir enn 20 % fører normalt til tap av eksamensrett.

Godkjend prosjektskisse på ca. 3200-4000 ord; ca. 10-12 s med linjeavstand halvannan, margar 2,5 cm og Times New Roman 12 som skrifttype. Litteraturliste og vedlegg kjem i tillegg. Når to eller fleire studentar skriv i saman, blir omfanget utvida med 2/3 for kvar ny medforfattar.

Intern sensur. Vurderingsuttrykk: Greidd/Ikkje greidd.

Pensum er på ca. 1000 s, derav 300 s sjølvvald pensum. Eiga pensumliste blir utarbeidd.

Det blir gjennomført evaluering i form av spørjeskjema. Ein skriftleg rapport blir utarbeidd.

Emnet gjev ein introduksjon til musikkterapi med eit overblikk over feltet som grunnlag for vidare studium i faget. Grunnleggjande teoriar og omgrep, arbeidsmåtar og metodar, målgrupper og arbeidssettingar blir presenterte i eit historisk, kulturelt og systematisk perspektiv.

Undervisninga vil i hovudsak skje på dagtid og vil inkludere førelesingar, gruppeoppgåver, videoobservasjonar og eigenerfaringskomponentar. Arbeid med emnet krev evne til sjølvstendig tilegning av pensumlitteratur og evne til munnleg og skriftleg drøfting og analyse av praksiserfaringar i lys av pensumlitteraturen. Som førebuing til eksamen blir disse dugleikane oppøvde gjennom diskusjonar, studentpresentasjonar, skriftlige oppgåver og heimearbeid.

All undervisning er obligatorisk og omfattar Innføring i musikkterapeutiske teoriar og arbeidsmåtar (72 t). Det blir gitt ei munnleg og ei skriftleg oppgåve undervegs som må løysast for å kunne få godkjent emnet (jf. eigen semesterplan). Det er ein føresetnad at alle obligatoriske aktivitetar er gjennomførte og godkjende før oppmelding til eksamen. Fråvær på meir enn 20 % fører normalt til tap av eksamensrett.

Grunnleggjande bruksmusikalsk dugleik og kunnskapar i musikkteori.

Pensum er på ca. 1000 sider. Eiga pensumliste blir utarbeidd.

5 timars skriftleg eksamen. Minst to sensorar kor ein skal vera ekstern. Vurderingsuttrykk: Bokstavkarakterar.

Det blir gjennomført evaluering i form av spørjeskjema. Ein skriftleg rapport blir utarbeidd.