Gjennom dette fordjupingsarbeidet skal studenten utvikla eit sjølvstendig kunstnarleg uttrykk på høgt nivå.

Instituttet legg her til rette for at studenten får vidareutvikla spesialiseringa si gjennom høveleg teoretisk og praktisk arbeid.

Studenten framstiller eit større verk eller fleire kortare verk eller satsar for offentleg framføring, anten med instituttets krefter eller med musikarar utanfrå. Lengd og kompleksitet vert avtalt med faglærar. I samband med arbeidet set studenten seg inn i aktuelle problemstillingar, relevante verk og teknikkar. Når det er mogleg, skal studenten delta aktivt i innstuderinga.

Studenten skal elles gi ein munnleg presentasjon av dette arbeidet, til dømes i seminarform. Presentasjonen kan dreia seg om eige verk og produksjonsprosess, det kan vera ei utgreiing om relevant bakgrunnslitteratur og verkstudiar, teknikkar som er brukte, osb.

Obligatorisk undervisning:

Prosjektet vert til vanleg gjennomført i løpet av andre semester, og vert rettleia av lærar i hovuddisiplinen.

Eksamen består av 1) seminarpresentasjon og 2) verkframføring.

Seminarpresentasjonen skjer til vanleg i løpet av fjerde semester. Nokre gonger vil verkframføringa av praktiske årsaker ikkje kunna skje samstundes som presentasjonen, eller i geografisk nærleik av han. Framføringa må likevel vera gjennomført og dokumentert før studenten melder seg opp til avsluttande eksamen. Det skal gjerast lydopptak av verket eller verka.

Vurderinga vert gjort av minst to faglærarar. Karakterar: Greidd eller ikkje greidd.