Undervisninga startar i haustsemesteret og går over 2 semester. Dei to emna MUTP304 og MUTP301 går etter rotasjonsprinsippet, der MUTP301 har oppstart oddetalsår og MUTP304 partalsår, slik at desse emna har oppstart i 7. eller 9. semester i normalprogresjonen.

Emnet gjev ei innføring i musikkterapi i psykisk helsearbeid og eldreomsorg og inneheld tre hovudkomponentar: Musikkterapi i psykisk helsearbeid, Musikkterapi i eldreomsorg og Relasjons- og kommunikasjonserfaringsgruppe / Innføring i BMGIM. Praksis inngår i emnet.

Musikkterapi i psykisk helsearbeid

Kurset gjev ei innføring i musikkterapi som helsefremmande og psykoterapeutisk arbeid innanfor psykisk helsevern, med hovudvekt på ressursorienterte tilnærmingar og med introduksjon til sentral forsking på feltet. Både individuell musikkterapi og gruppemusikkterapi, for barn/unge og vaksne, blir vektlagt. Kurset tar sikte på å gje ei innføring i ulike musikkterapeutisk metodar som blir brukt i arbeid med psykisk helse og skal kvalifisere studentane til ressursorientert musikkterapeutisk praksis innanfor psykisk helsevern. Samtale som ein integrert del av det musikkterapeutiske arbeidet vert vektlagt.

Musikkterapi i eldreomsorg

Kurset gjev ei innføring i musikkterapi i eldreomsorg, med fokus både på heimebuande eldre med relativt avgrensa hjelpebehov og eldre på institusjon med omfattande hjelpebehov. Kurset tar sikte på å gje ei innføring i ulike musikkterapeutiske arbeidsmåtar innan eldreomsorg, med introduksjon til sentral forsking på feltet. Relasjonelle og ressursorienterte tilnærmingar blir vektlagde, med fokus både på individuelle tilbod, tilrettelagde gruppetilbod og ulike former for miljøtiltak, som t.d. korarbeid. Det blir lagt vekt på at studentane skal utvikle evne til å støtte og anerkjenne dei eldres eigne musikkinteresser. Tverrfagleg samarbeid og samarbeid med pårørande og frivillige blir også vektlagd.

Relasjons- og kommunikasjonserfaringsgruppe / Innføring i BMGIM

Relasjons- og kommunikasjonserfaringsgruppa byggjer vidare på tilsvarande kurs på MUTP201, MUTP202 og MUTP301 og gjev studentane høve til å arbeide vidare med kommunikativ kompetanse i arbeid med menneske, i relasjon til ei grundigare forståing av kva som ligg i terapeutisk identitet og rolle. Kurset gjev rom for erfaring med og arbeid med gruppeprosessar og med personlege prosessar knytt til erfaringar i undervisning og praksis ved studiet.

Innføring i BMGIM (The Bonny Method of Guided Imagery and Music) inngår i emnet.

Læringsmål

Gjennom arbeid med dei ulike delemna skal studenten utvikle den dugleiken og dei haldningar og kunnskapar som er nødvendige for utøving av musikkterapi innan psykisk helsearbeid og eldreomsorg. Emnet skal stimulere til personleg utvikling med vekt på refleksjon og samarbeid.

Opptak til 300-nivået av det integrerte masterprogrammet i musikkterapi.

Undervisninga blir lagt opp med varierte undervisningsformer med tanke på integrasjon av teoretisk og praktisk-metodisk kunnskapsstoff, og vil inkludere førelesingar, gruppearbeid, diskusjonar og dessutan ei verkstadsform med fokus på å tileigne seg, prøve ut, få rettleiing på og vidareutvikle praktisk-metodisk dugleik i musikkterapi.

Praksis kan skje både på dagtid, kveldstid og helger, eller i samband med framføringar, prosjekt, osb. Praksis vil ha kontinuerlig rettleiing. Det skal skrivast ein kort praksisrapport frå kvar praksisperiode.

All undervisning er obligatorisk og omfattar teoretiske kurs i klinisk psykologi, teoretisk kurs i sosialpsykologi og samfunnspsykologi, kombinert teoretisk og praktisk-metodisk kurs i musikkterapi i psykisk helsearbeid og kombinert teoretisk og praktisk-metodisk kurs i musikkterapi i eldreomsorg. I tillegg kjem Relasjons- og kommunikasjonsseminar, innføring i BMGIM og Praksis. Det blir gitt munnlege og skriftlege oppgåver undervegs i semesteret. Ei praktisk-metodisk arbeidsbok skal utarbeidast. Det er ein føresetnad at alle obligatoriske aktivitetar er gjennomførte og godkjende før eksamen.

Praksisen i MUTP301 må sjåast i relasjon til at MUTP301 og MUTP304 er organiserte etter rotasjonsprinsippet.

Studentar i 7. og 8. semester tar punktpraksis og blokkpraksis under rettleiing av musikkterapeut. Fagleg må praksisen gjerne vere knytt til psykisk helsearbeid og eldreomsorg, men praksis knytt til habilitering, nevrorehabilitering og medisinske kontekstar vil også vere relevant og det er dessutan mogeleg for studentane å ta delar av denne praksisen innan pedagogiske eller samfunnsorienterte kontekstar. Det er forventa at ein av dei to praksisplassane i 7. og 8. semester skal vere innan helsesektoren (t.d. sjukehus, sjukeheim eller psykisk helsevern).

Studentar i 9. og 10. har sjølvstendig praksis med rettleiing frå studiet. Studenten har sjølv ansvar for å finne praksisplass for det siste året av det integrerte masterprogrammet. Som hovudregel skal den sjølvstendige praksisen vere innan eit felt der studenten tidlegare har hatt ordinær praksis.

Munnleg foredrag, der kandidaten gjer greie for relevante aspekt av planlegging, gjennomføring og/eller evaluering av eit musikkterapeutisk tiltak, eventuelt andre relevante aspekt knytt til musikkterapeutisk praksis innan psykisk helsearbeid og eldreomsorg. Foredraget skal vere på ca. 30 minutt og skal leggje vekt på teoretisk og empirisk belegg for aktuelle praksisval og -vurderingar.

Intern sensur. Vurderingsuttrykk: Greidd/Ikkje greidd.

Pensum er på ca. 800 s. Eiga pensumliste blir utarbeidd.

Det blir gjennomført evaluering i form av spørjeskjema. Ein skriftleg rapport blir utarbeidd.