Bachelor

Norsk. Dansk og svensk kan og verte brukte i nokon grad.

Haustsemesteret

Bergen

Temaa på emnet er (1) norrønt språk og moderne færøysk og islandsk, (2) språkhistorie, (3) fonetikk og fonologi, (4) dialektologi og (5) sosiolingvistikk.

Emnet skal saman med NOSP102 gje studentane eit felles utgangspunkt som dannar grunnstammen i det språklege nordiskstudiet, og som er naudsynt for norsklærarar, språk- og litteraturkonsulentar og andre som utøver yrke der språklege og litterære kvalifikasjonar er eit krav.

Fonologi. Emnet skal gje ei grunnleggjande innføring i korleis vi lagar språklydar (artikulatorisk fonetikk), og moderne norsk lydstruktur (fonologi). Lydsystemet ligg i botnen av språkstrukturen, og fonologisk innsikt er viktig for fleire delar av språkstudiet, ikkje minst språkhistorie og dialektologi.

Norrønt språk og moderne færøysk og islandsk. Emnet skal gje ei innføring i norrønt språk, dvs. det norske og islandske språket i tida 700-1350. Studiet av norrønt skal gje kunnskap om viktige trekk ved fonologi (lydlære) og grammatikk og knyte desse til moderne norsk språkstruktur. Norrønt er originalspråket for den omfattande norrøne litteraturen, og lesing av ein kort prosatekst i normalisert språkform vil stå sentralt. Det skal òg lesast ein kort og enkel prosatekst på kvart av språka færøysk og islandsk. I tilknyting til desse gjer ein seg kjend med dei mest sentrale draga ved uttalen og grammatiske likskapar og skilnader i høve til norrønt og moderne norsk.

Språkhistorie. Emnet skal gje studentane kunnskap om korleis norsk (og i nokon grad dei andre nordiske språka) har utvikla seg frå urnordisk til moderne tid.

Talemål. Emnet skal gje kunnskap om viktige trekk ved den nordiske dialektsituasjonen (med hovudvekt på norske tilhøve), den geografiske utbreiinga av språkdrag og den historiske og sosiale bakgrunnen for dei. Eit utval norske målføreprøver skal studerast både fonologisk og grammatisk.

Sosiolingvistikk. Studiet skal gje innsikt i sentrale sosiolingvistiske tema, som talemålsvariasjon, språkkontakt, språkleg identitet og språkhaldningar. Disiplinen skal skape forståing av språket som samfunnsfenomen og tilhøvet mellom språksamfunn og språkbrukar, og til språkhistoria.

Det vert lagt stor vekt på samanhengane mellom dei ulike delane av emnet.

Studentar som har teke NOSP102 (-F) med pensum frå hausten 2010 eller tidlegare, les moderne skriftspråkshistorie i staden for sosiolingvistikk. Det vert ikkje gjeve undervisning i moderne skriftspråkshistorie, med unnatak av haustsemesteret 2010.

Etter å ha studert emnet skal studentane kunne

- gjere greie for grunnleggjande artikulatorisk fonetikk og hovudtrekk ved moderne norsk fonologi

- grunnleggjande bruk av IPA (det internasjonale fonetiske alfabetet) for norsk

- lese og omsetje kjend norrøn prosatekst med hjelp av ordbok

- gjere greie for hovudtrekk i norrøn fonologi og grammatikk

- gjere greie for dei mest sentrale draga ved færøysk og islandsk uttale og grammatikk og grammatiske skilnader og likskapar i høve til norrønt og moderne norsk

- gjere greie for sentrale trekk ved språkhistorie og moderne dialektar

- trekkje linjer frå norrønt språk til moderne norsk

- bruke kunnskapane til å analysere og kommentere språkleg materiale i form av kjende norrøne og vestnordiske tekstar og dialektprøver

- drøfte ulike synsmåtar og analysemåtar i tilknyting til temaa i emnet

- gjere greie for sentrale trekk ved sosial språkleg variasjon og sosiolingvistisk teori

- trekkje linjer mellom dei ulike temaa i emnet

- skrive både bokmål og nynorsk korrekt og godt

Studentar som har teke NOSP102 (-F) med pensum frå hausten 2010 eller tidlegare, skal i staden for dei sosiolingvistiske krava kunne

- gjere greie for hovuddrag i utviklinga av landsmål/nynorsk og riksmål/bokmål frå 1800-talet til samtida

EXFAC00SK Språk og kommunikasjon er sterkt tilrådd grunnlag.

Førelesingar: om lag 64 timar (noko meir enn 2 dobbeltimar i veka)

Oppgåveseminar: om lag 64 timar for studenten (noko meir enn 2 dobbeltimar i veka), med lærar til stades om lag halve tida. I desse timane inngår det nynorskøvingar. Dersom talet på deltakande studentar på seminaret vert høgt, kan det verte aktuelt å opprette fleire grupper, avhengig av tilgjengelege lærarressursar.

Skriftleg tilbakemelding på obligatorisk innleveringsoppgåve.

For studentar som har teke NOSP102, vert det hausten 2010 gjeve 8 timar førelesing og 8 timar oppgåveseminar i moderne skriftspråkshistorie.

Om det melder seg færre enn fem studentar til eit emne, kan instituttet innføre redusert undervisning, jamfør instituttet sine retningslinjer for dette på Mi side. På emne der dette kan verte aktuelt, vil studentane få informasjon om det ved semesterstart og før semesterregistreringsfristen 1. februar / 1. september.

Ei kort innleveringsoppgåve på nynorsk tidleg i semesteret. Oppgåvesvaret skal ikkje vere lengre enn 350 ord. Dersom studenten ikkje har levert eit tilstrekkeleg godt svar, må oppgåva leverast på nytt i klart betra stand.

Den obligatoriske oppgåva er gyldig i eitt semester etter det semesteret ho vart gjennomført.

Eksamenen er todelt. Den første delen er ei skriftleg prøve (skuleeksamen) på 6 timar. Den andre delen er ein heimeeksamen på 4 dagar (frå måndag kl. 9.00 til fredag kl. 13.00). Skuleeksamenen skal skrivast på nynorsk, heimeeksamenen på bokmål.

Det er høve til å ta eksamen i vårsemesteret dersom obligatoriske arbeidskrav er innfridde i det føregåande haustsemesteret.

Norrøn ordbok og norrønt bøyingsskjema er tillatne hjelpemiddel på den skriftlege prøva.

Ved fastsetjinga av karakter vert det lagt stor vekt på om studenten skriv korrekt og godt.

Det vert nytta bokstavkarakterar frå A til F, der F er stryk. Skuleeksamenen tel 2/3 og heimeeksamenen 1/3 av den endelege karakteren. Studenten må stå på begge delane i same semesteret for å stå på heile eksamenen.

Karakterskala A-F.

Studentar som har avlagt eksamen i NOFI101 Innføring i norrønt språk eller NOFI111 Norrønt språk, legg opp eit alternativt pensum i emnet. Instituttet fastset dette pensumet. Det vert ikkje gjeve undervisning i det.

Studentar som kombinerer NOSP103 med NOSP101 Grunnemne i nordisk språk, får ein studiepoengsreduksjon på 5 studiepoeng. Studentar som kombinerer NOSP103 med temaet Talemål frå NOSP110 Lite valemne i nordisk språk eller NOSP120 Stort valemne i nordisk språk, får ein reduksjon på 5 studiepoeng.

Pensumet tilsvarer om lag 1000 sider av normal vanskegrad. Instituttet fastset pensumet.

Studentar som har teke NOSP102 (-F) med pensum frå våren 2010 eller tidlegare, skal leggje opp eit alternativt pensum.

Emneevalueringar vert gjennomførte i tråd med UiB sitt kvalitetssikringssystem.

Institutt for lingvistiske, litterære og estetiske studium

E-post: studierettleiar@lle.uib.no