Ved fullført mastergrad:

Kunnskapar

Kandidaten

• har vidareutvikla kunnskapen han/ho bringar med seg frå tidlegare studium i engelsk gjennom spesialiserte studium i engelsk lingvistikk og/eller engelskspråkleg litteratur eller/og kultur
• har brei generell kunnskap innanfor faget og inngåande kunnskapar innanfor eit avgrensa område
• har grunnleggjande kunnskap om dei sentrale problemstillingane og metodane i den valde disiplinen

Ferdigheiter

Kandidaten

• kan arbeide sjølvstendig og langsiktig med problemløysing på grunnlag av faglege kunnskapar
• kan setje seg inn i og vurdere kritisk teoriar, metodar og tolkingar innanfor fagområdet
• kan skaffe seg og nytte kunnskap på nye område innanfor faget
• kan gjennomføre eit avgrensa forskings- eller utviklingsprosjekt under rettleiing og i tråd med gjeldande forskingsetiske normer
• kjenner normene for akademisk skriving
• kan bruke IKT-verktøy som er naudsynte for å gjennomføre eit sjølvstendig arbeid innanfor fagområdet

Generell kompetanse

Kandidaten

• er i stand til å halde fram med eiga kompetanseutvikling og spesialisering på ein sjølvstendig måte
• kan uttrykkje på engelsk faglege problemstillingar, analysar og konklusjonar innanfor eige fagområde
• kjenner til relevante kommunikative sjangrar
• kan ta del i den offentlege debatten der denne rører ved fagområdet

Studentane skal møte til rettleiing under arbeidet med masteroppgåva. Ein rettleiingskontrakt som gjer nærare greie for rettar og plikter, skal skrivast under av student, rettleiar og instituttstyrar.

Studentane blir oppmoda til å finne eit tema for masteroppgåva så tidleg som mogleg i andre semester. Masteroppgåva blir til vanleg skriven i løpet av det tredje og fjerde semesteret.

Studentar skal som ledd i arbeidet med masteroppgåva halde og få godkjent tre innlegg ved eitt av instituttet sine Work-in-Progress-seminar for masterstudentar:

1. ei prosjektskisse med ein kort bibliografi,
2. eit utkast til eit kapittel av masteroppgåva,
3. ein kommentar til kapittelutkastet til ein av dei andre studentane.

Det første innlegget er ei prosjektskisse som skal haldast i løpet av studenten sitt andre undervisningssemester innanfor frist satt av seminarleiar. Innlegg nummer to og tre skal haldast i 3. eller 4. semester. Ein ventar at studentane på ein aktiv måte tek del i seminarrekkja, både ved å presentere eigne innlegg og ved å ta del i diskusjonar om det andre legg fram. Det er spesielt viktig at studentane tek del i dette seminaret dei to semestra dei arbeider med oppgåva.

Kursdelen av masterstudiet må vere greidd før ein går opp til eksamen. Alle obligatoriske arbeidskrav må vere oppfylte slik at ein skal kunne møte til eksamen.

Endeleg mastergradseksamen (d.v.s. innlevering av masteroppgåva og justerande munnleg prøve) kan gjennomførast i byrjinga og slutten av kvart semester. Innleveringsfrist for masteroppgåva er 1. februar og 15. mai i vårsemesteret, og 1. september og 20. november i haustsemesteret.

Masteroppgåva skal skrivast på engelsk og vere på mellom 70 og 110 sider (talet på ord i oppgåva må vere mellom 25 900 og 40 700 ord).

Den munnlege prøva har tilknyting til masteroppgåva og kan justere karakteren for masteroppgåva opp eller ned med ein karakter.