Målet er å gje studenten innsikt og trening i bruk av historieteori, historiske metodar og historiske kjelder. Emnet vil gje studenten reiskap til å arbeide sjølvstendig og kritisk med historisk litteratur og kjelder og forstå ulike sjangrar og dei spesielle problema som knyter seg til desse.

Gjennom skriving av tre oppgåver lærer studenten å drøfte teoretiske og metodiske problem og sjølv å vurdere og anvende historiske kjelder.

Emnet vil gje studenten det naudsynte metodiske grunnlaget for HIS250 Bacheloroppgåva og for vidare studium på masternivå. Emnet er difor obligatorisk i ei ordinær historiespesialisering.

 http://www.uib.no/fag/historie/73558/temaomtalar-historie

Kunnskapar
Studenten skal ha kjennskap til kva plass teoriar har i historieforskinga, til ulike metodar, og til dei grunnleggande prinsippa for historisk kjeldekritikk. Studenten skal vere kjent med eit bredt utval av skriftlege kjelder frå fleire historiske periodar, og dei spesielle problema som er knytte til desse.

Ferdigheiter
Studenten kan demonstrere teoretiske og metodiske ferdigheiter og evne til å bruke kjeldemateriale på ein både kritisk og konstruktiv måte for å svare på historiske problemstillingar.

Generell kompetanse
Kjeldekritikk er noko som vert nytta overalt i samfunnet der verdien av informasjon og representativitet i ei informasjonsmengd skal vurderast. Kjennskap til ulike metodar for å løyse problem og etablere ny kunnskap er viktige ferdigheiter i kunnskapssamfunnet. Ei systematisk trening på desse felta vil såleis kunne ha stor verdi også utanfor historiestudiet.

Eksamen består av ei mappe med to rettleidde oppgåver og ei ikkje-rettleidd oppgåve.

Studenten skal skrive tre oppgåver, kvar på 2000-3000 ord. To oppgåver skal leverast i løpet av semesteret, den tredje ved semesterslutt, til opplyste fristar.

Studenten vil få ei skriftleg rettleiing på dei to første oppgåvene før endeleg innlevering.

Den tredje oppgåva vert ikkje rettleid.

Oppgåvene skal leverast elektronisk.

Det blir gitt ein samla karakter, der oppgåvene vert vekta likt. Alle oppgåvene må vere leverte og beståtte i eitt og same undervisningssemester.