Emnet har fire hovudtema: (1) grammatikk, dvs. morfologi (ordlære) og syntaks (setningslære), (2) moderne skriftspråkshistorie, (3) pragmatikk og tekstlingvistikk og (4) grannespråkskunnskap (dansk og svensk).

Emnet skal saman med NOSP103 (eller NOSP103-L) gje studentane eit felles utgangspunkt som dannar grunnstammen i det språklege nordiskstudiet, og som er naudsynt for norsklærarar, språk- og litteraturkonsulentar og andre som utøver yrke der språklege og litterære kvalifikasjonar er eit krav.

Grammatikk. Emnet skal gje studentane innsikt i moderne norsk språkstruktur. Studiet av språksystemet er viktig både som kunnskapsbasis og samanhengsskapar for studiet av andre språklege disiplinar. Det skal bidra til kunnskap om sentrale trekk ved norsk ordstruktur (morfologi) og setningsstruktur (syntaks) og vert komplettert av studiet av lydstruktur (fonologi) i emnet NOSP103. Morfologiske og syntaktiske kunnskapar er heilt sentrale i all språkkunnskap, ikkje minst for språkbrukaren sin dugleik i skriftleg bruk av språket.

Moderne skriftspråkshistorie. Emnet skal gje kunnskap om utviklinga av norsk frå 1800-talet til vår eiga tid, med framveksten av landsmål/nynorsk og riksmål/bokmål og utviklinga og den offentlege normeringa av målformene.

Pragmatikk og tekstlingvistikk. Emnet skal gje studentane innsikt i sentrale område innanfor pragmatikk og tekstlingvistikk, som tilhøvet mellom skriftleg og munnleg språk, språkhandlingar, tekstbinding o.a. Det skal bidra til kunnskap om korleis vi utnyttar språksystemet til å skape meining og tilpasse språkbuken etter ulike situasjonar og brukssamanhengar.

Grannespråka. Emnet skal gje grunnleggjande kjennskap til dansk og svensk språkhistorie, dialektologi og språksystem. Det vert lagt særleg vekt på samanhengen mellom dansk morfologi og bokmål.

Det vert lagt stor vekt på samanhengane mellom dei ulike delane som emnet er samansett av.

Etter å ha studert emnet skal studentane kunne

- gjere greie for viktige trekk ved moderne norsk morfologi og syntaks

- gjere greie for hovuddrag i utviklinga av landsmål/nynorsk og riksmål/bokmål frå 1800-talet til samtida

- gjere greie for viktige tema innanfor pragmatikk og tekstlingvistikk

- kjenne hovudtrekk av dansk og svensk språkhistorie, dialektologi og moderne språksystem

- setje den skandinaviske, særleg den norske, språksituasjonen inn i ein kulturell og sosial samanheng

- bruke kunnskapane til å analysere språkleg materiale, t.d. i grammatisk og tekstleg analyse

- drøfte ulike synsmåtar og analysemåtar i tilknyting til temaa i emnet

- trekkje linjer mellom dei ulike temaa i emnet

- skrive både bokmål og nynorsk korrekt og godt

Ingen.

EXFAC00SK Språk og kommunikasjon er sterkt tilrådd grunnlag.

Førelesingar: om lag 52 timar (2 dobbeltimar i veka).

Oppgåveseminar: om lag 52 timar for studenten (2 dobbeltimar i veka), med lærar til stades om lag halve tida.

Nynorskøvingar: om lag 12 timar for studenten (6 dobbeltimar), med lærar til stades om lag halve tida. Øvingane er primært meinte for studentar som ikkje har teke NOSP103, men er opne for alle.

Dersom talet på deltakande studentar på seminaret eller nynorskøvingane vert høgt, kan det verte aktuelt å opprette fleire grupper, avhengig av tilgjengelege lærarressursar.

Skriftleg tilbakemelding på obligatoriske innleveringsoppgåver.

Det er venta at studentane er til stades på undervisninga, og dette ligg til grunn når ein organiserer undervisninga og lagar eksamensoppgåver.

Om det melder seg færre enn fem studentar til eit emne, kan instituttet innføre redusert undervisning, jamfør instituttet sine retningslinjer for dette på Mitt UiB. På emne der dette kan verte aktuelt, vil studentane få informasjon om det ved semesterstart og før semesterregistreringsfristen 1. februar / 1. september.

To innleveringsoppgåver og to kommentarar til medstudentar sine oppgåvesvar (éin i kvar innleveringsrunde).

Éi oppgåve med tilhøyrande kommentar skal vere på bokmål, den andre på nynorsk. Oppgåvene skal vere på om lag 500 ord, og kommentarane skal vere på om lag 100 ord.

Fristar, nærmare retningslinjer og informasjon for oppgåver og kommentarar blir gitt på Mitt UiB ved semesterstart. Studentane får éi veke til å svare på kvar oppgåve, og éi veke til kommentaren.

Minst éi av oppgåvene som blir gitt, skal ha fagdidaktisk relevans.

På det første av oppgåveseminara etter at ei oppgåve er gitt, vil faglæraren gi rettleiing og svare på ev. spørsmål. Studentane har lov til å diskutere oppgåvene, men må levere individuelle svar utan felles tekst.

Studentane får individuell tilbakemelding på språkføringa. Det faglege innhaldet blir enten berre godkjent, eller det blir gitt tilbakemelding om kva som må betrast for at det skal kunne godkjennast. Svar som språkleg eller fagleg er for svake, må leverast på nytt i klart betra stand. Når desse er leverte og godkjente, legg faglæraren ut fire grundig kommenterte anonymiserte svar som kvar student kan samanlikne med sitt eige svar.

Alle dei obligatoriske aktivitetane må vere godkjende i undervisningssemesteret. Obligatoriske aktivitetar er gyldige i eit semester etter undervisningssemester.

Eksamenen er ei skriftleg prøve (skuleeksamen) på 6 timar. Eksamenen skal skrivast på bokmål. Ingen hjelpemiddel er tillatne.

Det er høve til å ta eksamen i haustsemesteret dersom obligatoriske arbeidskrav er innfridde i det føregåande vårsemesteret.

Ved fastsetjinga av karakter vert det lagt stor vekt på om studenten skriv korrekt og godt.

Det vert nytta bokstavkarakterar frå A til F, der F er stryk.

Karakterskala A-F.

Pensumet tilsvarer om lag 1000 sider av normal vanskegrad.

Instituttet fastset pensumet.

Institutt for lingvistiske, litterære og estetiske studium

E-post: studierettleiar@lle.uib.no