Fagdidaktikk i fransk inngår som ein del av universitetet si fransklærarutdanning. Sentralt i studiet er spørsmål knytte til kompetanseutvikling i fransk og til utvikling av fagdidaktisk refleksjon og handling.

Eit grunnleggjande spørsmål er korleis franskfagleg kunnskap kan verta utvikla og relatert til det å vere fransklærar. Særs viktig er det å utvikle forståing for korleis eigen språkkompetanse, innsikt i språket og innsikt i eigne læringsprosessar kan vere bidrag i arbeidet med å leggje til rette for elevane si språklæring.

Studiet er organisert slik at noko av undervisninga er tilbod på tvers av språkfaga for å understreke ein kunnskaps-teoretisk samanheng og danningsmålsetjingar som er felles for språkfaga i skolen.

Studiet består av fire målområde:

• Faget si legitimering i skolen i dag
• Teoriar om språklæring
• Tilrettelegging for fransklæring
• Rettleiing og vurdering

Gjennom studiet skal studentane utvikle innsikt i franskfaget sitt kultur- og danningspotensial og kunne gjere greie for faget si utforming og samfunnsmessige grunngjevingar i skolen i dag. Dei skal setje seg inn i teoriar om språklæring og kunne buke desse i arbeidet med elevane si læring i fransk. Dei skal vere i stand til å undersøkje elevane si fransklæring og vilkår for fransklæring i skolen.

Studentane skal:

• ha kunnskap om vilkår for læring og kompetanseutvikling i fransk,
• kunne undersøkje og drøfte fransklæring i lys av kunnskap innanfor dei franskfaglege disiplinane (språk, litteratur, kultur og fagdidaktikk) og teoriar om innovasjon, og presentere refleksjon over dette skriftleg og munnleg,
• utvikle evna til å rettleie elevane i deira læringsprosessar på grunnlag av teoriar om språk, tekst, kultur og framandspråksutvikling, og kunne vurdere elevane sitt læringsutbytte,
• utvikle evna til å reflektere over og vurdere eiga undervisning for å kunne fornye og utvikle den fagdidaktiske kompetansen i fransk, irekna den digitale kompetansen.
• vurdere læremiddel og arbeidsformer i franskfaget i relasjon til læreplanen for faget, og kunne grunngi val og vurderingar ut frå eige fagsyn og praksisteori.
• kunne uttrykkje seg munnleg og skriftleg på fransk innan fagfeltet.

- Om lag 24 timar førelesingar inkl. om lag 4 timar fellesførelesingar i språkdidaktikk

- Rettleing og skulebesøk

Undervisninga er både virtuell og ansikt til ansikt.

For å kunne gå opp til eksamen må studentane innan fastsette tidsfristar:

• ha teke aktivt del i ein forumsdiskusjon på nettet der sentrale fagdidaktiske spørsmål vert drøfta i lys av eigne praksiserfaringar og fagdidaktisk teori.
• ha publisert praksisloggar i praksisperioden
• ha lagt fram undervisningsopplegg på undervisningsverkstad.

Det er obligatorisk frammøte på minst 75% av undervisningane, og organiseringa av undervisninga har dette som utgangspunkt.

Eksamensforma er ein 7-dagars heimeeksamen med oppgitt tema. Det skriftlege arbeidet skal ha eit omfang på ca 3000 ord, litteraturliste og vedlegg ikkje medrekna.

Ein kan nytta norsk eller fransk.