Fagleg innhald

Vi menneske omgir oss med ting og lever våre liv i tett omgang med våre materielle omgjevnader. Det materielle har alltid stått sentralt i dagleglivet i form av rurale og urbane landskap, bruksting og minnegjenstandar. Den fysiske omverda dannar rammer for daglege gjeremål, for korleis vi uttrykkjer oss og skaper band til andre gjennom ting. Det materielle dannar kort sagt praktiske, meiningsskapande og eksistensielle føresetnader for korleis vi lever.

Emnet gir ei innføring i kulturvitskaplege teoriar om kva det materielle betyr for kulturelt liv, med utgangspunkt i personlege gjenstandskategoriar og offentlege materielle omgjevnader som byrom og bygningar.

Emnet vil fokusere på det materielle som kulturelt fenomen. Dette inneber blant anna å studere endringar relatert både til gjenstandskategoriar og deira meiningssamanhengar i fortid og notid.

Læringsmål
Emnet skal gje ei innføring i kva betyding materielle omgjevnader og gjenstandar har i vårt daglegliv. Emnet skal lære studentane å sjå det materielle som kulturelle fenomen som kan problematiserast på ulike måtar.

Kunnskapar
Etter fullført studium skal studenten ha kunnskap om det materielle si kulturelle meining og kjenna til forskingslitteratur på feltet.

Ferdigheiter
Studentane har fått øving i å analysera materielle og kulturelle uttrykk og å formidla resultatet i skriftleg og munnleg form.

Generell kompetanse
Studentane har lært å kommunisera om faglege tema med andre med bakgrunn innan det same fagområdet.

Emnet har 7 dagars heimeeksamen og justerande munnleg eksamen (maksimalt justering er éin karakter). Oppgåva skal ha eit omfang på om lag 3000 ord.

Obligatoriske aktivitetar må vera gjennomførte for at studenten kan gå opp til eksamen.

Instituttet utarbeider pensumlister, pensum er på 1200 - 1500 sider.

Litteraturlista vil vere klar innan 01.06. for haustsemesteret og 01.01. for vårsemesteret.