Norsk

Emnet har som mål å gi ei detaljert innføring i dei sentrale komponentane i manushandverket gjennom forelesingar om, og analysar av, generelle manuskonvensjonar og konkrete manuskript.

Undervisinga er intensiv og seminarbasert. Ho blir gitt av praksislærar, vitskapleg stab og høgt kvalifiserte gjesteforelesarar. Emnet består av fire modular.

Modul 1: Konseptet, kjernen og drivkrafta i forteljinga:

Denne modulen handlar om å utvikle studenten si evne til å finne og spisse ideen til ein serie. Her lærer studenten òg om tematikk og undertekst.

Modul 2: Dramatisk struktur:

Denne modulen handlar om ulike narrative konvensjonar innan webseriar, miniseriar, episodiske seriar, serialisert fleirsesongdrama og såpeopera. Her lærer studenten om skilnader i dramaturgiske prinsipp og arbeidsmetodar innan ulike serieformat, og meir generelt om skilnadene mellom manusutvikling for serieformat og spelefilm. Studenten skal òg lære om korleis ein praktisk strukturerer manusarbeidet i ulike typar serieproduksjonar. Hovudvekta ligg på fiksjon, men dokumentariske seriar blir også tematiserte.

Modul 3: Element i manusutvikling:

Denne modulen tek for seg fire sentrale, meir avgrensa, komponentar i arbeidet med manus

• Scena: Denne komponenten lærer studenten å utforme den enkelte scena i eit manus
• Eksposisjon: Denne komponenten handlar om ulike strategiar («show» vs. «tell», bruk av voiceover og liknande) for å bake inn forteljingas kven/kva/kvar/når/kvifor og korleis ¿ kort sagt den informasjonen publikum treng for å forstå historia
• Karakterteikning og karakterutvikling: Denne komponenten handlar om å forme karakterane, deira psykologiske utrustning og motivasjon i ulike format, sjangrar og samanhengar
• Rewriting: Denne komponenten handlar om viktigheita av å revidere manus på bakgrunn av tilbakemeldingar

Sjølv om undervisinga er strukturert rundt ulike tema, vil dei i praksis i stor grad gripe inn i kvarandre, og peike fram mot tema som blir behandla meir inngåande andre semester. Gjennom semesteret følgjer studentane òg ein serie med frukostseminar, der dei kan møte masterstudentar frå dei andre profesjonsorienterte utdanningane MASV-MIX og MASV-JOU. Målet er at dei skal utveksle prosjektidear og utforske moglegheitene for samarbeid. Saman med faglærar legg studentane opp programmet for seminaret, som også vil vere ein arena der studentane saman med faglærarane diskuterer tema og organisering av workshops som går på tvers av dei tre programma.

Studenten skal ved avslutta emne ha følgjande læringsutbyte:

Kunnskap og ferdigheiter:

Studenten

• har kunnskap om og ferdigheiter i å utvikle og spisse ideen til eit seriekonsept
• har kunnskap om dramaturgiske prinsipp og arbeidsmetodar for ulike typar serieformat
• har kunnskap om skilnadene mellom manusutvikling for serieformat og spelefilm, som kviler på analytisk og handtverksmessigforståing av dei ulike produksjonane sine estetiske moglegheiter og avgrensingar
• har kunnskap om og ferdigheiter innan skriving av enkeltscener
• har kunnskap om og ferdigheiter innan skriving av eksposisjon
• har kunnskap om og ferdigheiter innan karakterteikning og karakterutvikling. Studenten veit til dømes skilnaden på flate og runde karakterar, og på plottdrivne og karakterdrivne forteljingar. Studenten kan vidare relatere omgrepa til eigen praksis og reflektere kritisk rundt funksjonen av ulike strategiar og konvensjonar for karakterteikning og karakterutvikling

Generell kompetanse:

Studenten

• kan analysere relevante faglege og forskingsetiske problemstillingar knytte til manusutvikling
• kan nytte kunnskapane og ferdigheitene sine innan manusutvikling på nye tema og plattformer for å gjennomføre avanserte arbeidsoppgåver og prosjekt
• kan formidle omfattande sjølvstendig arbeid og meistrar uttrykksformene innan fagområdet
• kan bidra til nytenking om manusutvikling og sentrale komponentar i manushandverket
• kan kommunisere om faglege problemstillingar, analyser og konklusjonar innan manusutvikling, både med spesialistar og til ålmenta

• Innlevering av intensjonsnotat i byrjinga av semesteret, som skildrar konseptet, serieformatet og målgruppe (1000 ord)
• Skriveøving: scene
• Skriveøving: eksposisjon
• Skriveøving: karakterteikning
• Deltaking på 50% av frukostseminara
• Studenten skal evaluere medstudentane sine manus til webserie på tre trinn i prosessen
• Studentar som ikkje er tatt opp frå bachelorprogrammet i tv-produksjon skal følgje workshoppen i TVP101om formalia/konvensjonar for manusskriving

Dei obligatoriske krava må vere godkjende før studenten kan gå opp til eksamen.

Godkjente obligatoriske krav har ingen tidsavgrensing.

• manus til webserie i fire delar à 7-8 minutt (drama, komedie eller dokumentar)
• refleksjonsnotat om arbeidet (4500 ord, pluss/minus 10%)