RUS301 gjev ei grundig innføring i ei språkvitskapleg tilnærming til det russiske språket. Emnet inneheld fire delar, 1. språkhistorie, 2. tekstutdrag på kyrkjeslavisk og gamalrussisk, 3. moderne russisk språkstruktur og 4.evt. andre emne, som språk og samfunn, og dialektar.

Studentane blir presenterte for hovudtrekka i russisk språkhistorie, og det blir lagt særskilt vekt på å syna den relevansen språkutviklinga har for moderne standardrussisk og russiske dialektar. Samstundes gjev kurset eit oversyn over teksttypar og litterær aktivitet frå kristninga inntil 1800-talet. Utvalde tekstar og tekstdøme blir lesne og gått gjennom. Kurset byggjer vidare opp ei språkvitskapleg forståing for moderne russisk språkstruktur og presenterer sentrale emne innanfor moderne russisk sosiolingvistikk og/eller dialektologi.

• har ei oversikt over russisk språkhistorie og kan beskriva dei viktigaste språkendringane i russisk.
• har opparbeidd dugleik i å lesa og vurdera språkvitskapleg litteratur, både på russisk og på andre språk.
• har innsikt i sentrale språkendringar og språkvariasjonar over tid og i rom og kan forklara tilhøvet mellom standardspråk og dialektar og mellom skriftspråk og talemål.
• har oversikt over utviklinga av det russiske skriftspråket og av den russiske skriftkulturen og litteraturen før 1700.
• har innsikt i sentrale emne innanfor moderne russisk sosiolingvistikk og/eller dialektologi.
• kan nemna dei viktigaste skilnadene mellom nord- og sør-russiske dialektar.
• har ei god forståing av moderne russisk språkstruktur og utdjupa kunnskapar om enkeltemne, som morfologisk analyse o.a.
• har oppøvd ei kritisk og sjølvstendig haldning til språkvitskaplege problemstillingar, som er naudsynt for arbeid med ei masteroppgåve om russisk språk.