Norsk

Målet med emnet er å bidra til oversikt og innsikt i samfunnsinstitusjonar sine operative roller; offentlegheitslov og personvern; etiske retningsliner og andre rammefaktorar som bidrar til å sette premissar for undersøkande journalistikk. I lys av desse rammene gir kurset teoretisk djupne og praktisk trening i sentrale research-metodar i undersøkande journalistikk, både kvalitative og kvantitative. Dokumentanalyse eksemplifiserer research i kvalitative data. Store datamengder, open source og utvikling av databasar eksemplifiserer research i kvantitative data. Emnet er delt i tre modular og inkluderer avansert teoretisk og praktisk trening med tverrfaglege lærekrefter gjennom workshops. Studentane vil oppnå kritisk, konstruktiv og teknologisk kunnskap om avanserte arbeidsmetodar og analysar i pakt med ansvarleg bruk av nye teknologiar. Det blir lagt vekt på utforsking av publiserte og omdiskuterte grave-case samt tett samarbeid med undersøkande journalistikkmiljø i Media City Bergen og elles.

Modul 1 gir oversikt og innsikt i institusjonar som samfunnsaktørar, samt i etiske retningsliner, offentlegheitslova, personvern og ulike dilemma og utfordringar i relasjon til lovverk og innsynsrett. Gjennom workshops får studentane høve til å bryne argument og også praktisk trening når dei arbeider med ulike former for oppgåveløysing.

Modul 2 fokuserer på analyse og diskusjon av case i undersøkande journalistikk der reporterane har utmerka seg med spesielt interessante metodetilnærmingar eller resultat som har fått store konsekvensar og ført til handfaste endringar i samfunnet. Problematiske og omdiskuterte case vil også bli ettergått i konstruktivt lys. Her vil det bli arbeidd spesielt tett med gjestelærarar frå bransjen og frå ulike samfunnsinstitusjonar. Aktuelle tema kan hentast frå for eksempel helsejournalistikk, økonomijournalistikk, sportsjournalistikk, miljøjournalistikk eller kulturjournalistikk.

Modul 3 har eit eksplisitt fokus på bruk av nye teknologiar i undersøkande journalistikk. Her vil studentane få oversikt over, og trene på, eit spekter av teknologiar som kan brukast til datainnsamling, analyse og presentasjon av gravemateriale for eksempel gjennom datavisualiseringar.

Studentane vil også delta i frukostseminar saman med studentane frå dei to andre profesjonsorienterte masterutdanningane, MASV-MIX og MASV-MAN.

Studenten skal ved avslutta emne ha følgjande læringsutbytte:

Kunnskap:

Studenten

• kan forklare, diskutere og kritisk evaluere aktørrolla til sentrale norske samfunnsinstitusjonar
• kan forklare, diskutere og kritisk evaluere tema som handlar om offentlegheitslov, personvern og etiske retningsliner i undersøkande journalistikk

Dugleik:

Studenten

• kan analysere og kjenne att sterke og svake sider ved metodar og data brukt i ulike former for undersøkande journalistikk
• kan gjere bruk av datajournalistiske verktøy og andre former for ny teknologi i sjølvstendige graveprosjekt, og reflektere vitskapleg over desse tilnærmingane

Generell kompetanse:

Studenten

• kan analysere relevante fag-, yrkes- og forskingsetiske problemstillingar innan feltet undersøkande journalistikk
• kan kommunisere om faglege problemstillingar, analysar og konklusjonar innafor fagområdet undersøkande journalistikk, både med spesialistar og eit allment publikum

Deltaking i (om lag 75 t):

• Modul 1: workshop (om lag 30 t)
• Modul 2: workshop (om lag 30 t)
• Modul 3: instruksjon og rettleiing (om lag 40 t)

Obligatoriske oppgåver (om lag 225 t):

• Modul 1: Arbeid med to oppgåver (om lag 75 t)
• Modul 2: Arbeid med to oppgåver (om lag 75 t)
• Modul 3: Arbeid med gruppeoppgåve (om lag 75 t)

• To obligatoriske teorioppgåver
• To obligatoriske research/data-oppgåver
• Obligatorisk gruppeprosjekt
• Alle workshops er obligatoriske, med mindre det blir gitt rom for å velje mellom fleire

Dei obligatoriske krava må vere godkjende før studenten kan gå opp til eksamen.

Dei obligatoriske krava er gyldige i inneverande semester og to påfølgande semester.