Norsk

Å skrive profesjonelle manus for tv-fiksjon krev store doser mengdetrening. Dette emnet har først og fremst som mål å bevisstgjere studentane om manusprosessen, og gi verdifull røynsle med å skrive for tv-relevante format.

Emnet har fire modular.

Modul 1 Dramaturgiske konvensjonar i film- og tv-fiksjon:

Førelesingar om narrativ teori skal gjere studenten merksam på ulike bestanddelar og strukturelle moglegheiter i forteljinga. Førelesingane skal også gi kunnskap om dramaturgiske konvensjonar i film, tv-seriar og webseriar. Desse teoretiske førelesingane om narrativ teori og sjangerteori legg også vekt på å analysere og dissekere eksisterande manus, slik at studenten tileignar seg evna til kritisk å vurdere eiga skriving. Knytt til dette ser, diskuterer og vurderer studenten ei rekkje relevante døme på filmar og tv-seriar. Førelesingane blir supplerte av seminar med praksislærar og gjesteførelesingar med representantar frå bransjen.

Modul 2 Manusutvikling:

Praktisk arbeid med manusutvikling skal utvikle både skrivedugleik og evna til å bruke innsiktene frå den teoretiske undervisinga i eige arbeid. I denne praktiske modulen lærer studenten også om produsentrolla, og om forholdet mellom manus og budsjett.

Modul 3 Underhaldningsformat:

Gjennom gjesteførelesingar og seminar skal studenten tileigne seg bransjenær forståing av konsept- og formatutvikling innanfor ulike underhaldningssjangrar i tv. Undervisinga tek opp målgrupper og internasjonalt vidaresal. Studenten får praktisk trening i å utvikle underhaldningsformat, og skal lage ein promofilm for eitt slikt konsept som skal pitchast for bransjen.

I samband med denne modulen deltek studenten også i felles undervisning om opphavsrett og åndsverklov med studentane frå dei to andre profesjonsorienterte bachelorutdanningane.

Modul 4 Studioproduksjon:

Gjennom praktiske øvingar skal studentane tileigne seg grunnleggjande kunnskapar og ferdigheiter knytt til studioproduksjon. Øvingane kan variere frå semester til semester, men omfattar typisk bruk greenscreen-teknologi, keying, intervjuteknikk og studioavvikling.

Studenten skal ved avslutta emne ha følgjande læringsutbyte definert i kunnskapar, ferdigheiter og generell kompetanse: Kunnskap:

Studenten

• har brei kunnskap om manusutvikling og skriving som fag og handverk
• har kunnskap om manusprosessen i ulike typar fiksjonsproduksjonar, om korleis arbeidet blir strukturert, og kva som er fordelane med å strukturere arbeidet på ulike måtar, til dømes på ein filmproduksjon samanlikna med på ein tv-produksjon, eller på miniseriar samanlikna med fleirsesongdrama
• har innsikt i korleis bransjen arbeider med formatutvikling (konsept, sjanger, målgruppe, pitching, rettigheiter, vidaresal)
• har ei grunnleggjande forståing av sentrale aspekt ved studioproduksjon, inkludert den tekniske infrastrukturen og arbeidsflyten

Ferdigheiter:

Studenten

• har grunnleggjande ferdigheiter i manusskriving, og kan anvende teoretiske innsikter om idéutvikling, karakterbyggjing/karakterutvikling og dramaturgiske prinsipp i eige arbeid
• kan anvende teoretisk kunnskap og bransjekunnskap om formatutvikling i arbeidet med eit eige underhaldningsformat
• får øve opp ferdigheiter i pitching
• kan anvende relevant teknologi i studioproduksjon, og gjennomføre enkle studioproduksjonar

Generell kompetanse:

Studenten

• har innsikt i relevante teoretiske og praktiske fag- og yrkesetiske problemstillingar innan fagområdet konsept- og manusutvikling
• kan utveksle synspunkt og erfaringar med andre som har ein teoretisk og praktisk bakgrunn innanfor fagområdet, og såleis bidra til å utvikle god praksis
• kjenner til nytenking og innovasjonsprosessar innan konsept- og manusutvikling

To praktiske og en teoretisk deleksamen

Praktiske deleksamenar:

• Studenten skal skrive manus til ein webserie i tre episodar à 5-8 minutt. Dette manuset skal vidareutviklast fram mot femte semesteret (individuell eller gruppebasert innlevering)
• Studenten skal utvikle eit konsept for eit underhaldningsformat i tv, og lage ein tilhøyrande promofilm. Konseptet skal pitchast for bransjen (gruppevis)

Studentane skal vurdere kvarandre sine arbeid. Praksislærar og faglærar gir også tilbakemelding og vurderer kvar deleksamen til bestått/ikkje bestått.

Teoretisk deleksamen:

• Studenten skal skrive ein refleksjonsrapport til webseriemanuset på 3000 ord (pluss/minus 10%)

Institutt for informasjons- og medievitskap