Mål:

Emnet har som mål å gje studenten ei oversikt over ulike energiressursar, med hovudvekt på fornybare ressursar. Emnet skal også gje ei oversikt over nasjonalt og internasjonalt energiforbruk og energiproduksjon, og projeksjonar framover i tid. Studenten skal beherske sentrale omgrep som livssyklusanalyse, berekraft og energikostnadar.

Innhald:

Emnet gir ei oversikt over fornybare energiressursar som solenergi, vindenergi, vasskraft, energi frå tidevatn og bølgjer, bioenergi og geotermisk energi. I tillegg tek ein kort for seg kjernekraft og fossile energikjelder saman med CO2-fangst og lagring. Prinsippa for utnytting av dei ulike ressursane vert diskutert. Dagens energiproduksjon og bruk, både nasjonalt og globalt vil bli gjennomgått, saman med projeksjonar framover i tid. Omgrep som livssyklusanalyse, berekraft og energikostnadar vil bli introdusert og diskutert.

Studenten skal ved avslutta emne ha følgjande læringsutbyte definert i kunnskapar, ferdigheiter og generell kompetanse:

Kunnskapar

Studenten

• kan gjere greie for ulike energiressursar og deira relative rolle i den nasjonale og globale energiforsyninga
• kan gjere greie for korleis energi vert brukt og tilhøyrande krav til energiforsyninga
• kan vurdere mogleg framtidig bruk av ulike energikjelder

Ferdigheiter

Studenten

• kan gjere overslag på tilgjengeleg energi frå ulike ressursar
• kan gjere overslag på energikostnad

Generell kompetanse

Studenten

• kan gjere greie for grunnleggjande utfordringar knytt til utviklinga av global energibruk
• kan gjere greie for omgrep som berekraft og livsyklusvurderingar i samband med energiomforming og - bruk

4 forelesingar, 1 øvingstime per veke. Øvingane inkluderer rekneoppgåver knytt til forelesingane og diskusjon av aktuelle tema.

Det vil bli arrangert ekskursjonar til energibedrifter og- anlegg.

2/3 av øvingane må vere levert og godkjent for å ta eksamen.

Gyldig i fire semester: Det semesteret obligatoriske arbeidskrav vert godkjent + tre etterfølgjande semester.

Skriftleg eksamen, 4 timar.

Haust 2020 og vår 2021 skal ENERGI200 ha digital eksamen heime, se http://www.uib.no/student/86719/digital-vurdering-studenter

Studentane skal evaluere undervisninga i tråd med UiB og instituttet sitt kvalitetssikringssystem.

I utgangspunktet vil referansegrupper bli brukt årlig.