Emnet gjev ei grunnleggjande innføring i læring og læringsteori sett i eit pedagogisk perspektiv. Spørsmål omkring kunnskapsoverføring og kunnskapsutvikling blir tematisert og problematisert frå ulike teoretiske vinklar. Det blir lagt særleg vekt på å sjå læring i eit sosialt og kulturelt perspektiv. Emnet drøftar også historiske og kulturelle variasjonar i synet på sosialisering og oppseding. Læring blir også relatert til verktøy som me nyttar oss av når me lærer, primært skriving.

Studenten skal ved avslutta emne ha følgjande læringsutbyte definert i kunnskapar, ferdigheiter og generell kompetanse:

Kunnskapar:

Studenten...

• har kunnskap om sentrale læringsteoriar og deira relevans for pedagogikk
• har forståing for læringsprosessar sin relasjon til sosiale og kulturelle forhold
• har kjennskap til historiske og kulturelle variasjonar i syn på sosialisering og oppseding
• har innsikt i skriveprosessen si tyding som verktøy for læring

Ferdigheiter:

Studenten...

• kan bruke ulike teoretiske tilnærmingar for å forstå konkrete læringssituasjonar
• kan utvikle og vidareutvikle faglege tekstar i lys av tilbakemelding
• kan meistre relevante verktøy knytt til bruk av forskingslitteratur i eigne skriftlege arbeid

Generell kompetanse:

Studenten...

• kan gje og ta imot konstruktiv tilbakemelding på skriftlege tekstar
• kan reflektere over eigen skrive- og læringsprosess
• kan planlegge og gjennomføre arbeidsoppgåver over tid

Emnet er ope for studentar med studierett på årsstudiet i pedagogikk, bachelorprogrammet i pedagogikk og bachelorprogrammet i spesialpedagogikk ved UiB.

Undervisninga er lagt opp som ein kombinasjon av førelesingar, oppgåveskriving og litteraturstudium. Deler av skrive- og læringsaktiviteten vil skje i form av datastøtta samarbeidslæring. Det blir lagt opp til aktiv deltaking og kunnskapsdeling mellom studentar og lærarar.

Vurderingsforma i emnet er mappevurdering.

A-F

Litteraturlista vil vere klar innan 01.06. for haustsemesteret og 01.12. for vårsemesteret.