Målet med emnet er å gjere studenten kjend med utfordringane knytte til design av system og grenseflatar som presenterer medieinnhald til mediebrukarar. Døme er nye interaktive forteljingsformat, nye metodar for å aksessere nyhende, og nye bruksformer for spelelement i sosiale media. Emnet legg vekt på brukarevalueringar av mediebruk såvel som produksjon av originalt medieinnhald basert på innsikter frå evalueringar. Emnet inkluderer følgjande tema:

Modul 1: Utforske eksperimentelt medieinnhald produsert i eit eksisterande og etablert medium (til dømes ein ny app for ei riksdekkande avis, eller originalt multimedialt innhald for ein etablert TV-kanal). I denne modulen lærer studentane å evaluere bruk av innhald med subjektive metodar som kvalitative intervju og/eller fokusgrupper, og med objektive metodar som blikksporing og stressarmbånd. Studentane lærer om mediebruk i utvalde sosiodemografiske grupper. Arbeidet føregår i grupper som vert laga av faglærarane.

Modul 2: Utvikle medieinnhald til eit eksperimentelt, ikkje-etablert grensesnitt (til dømes dokumentar for VR-briller). I denne modulen lærer studentane å produsere innhald for nye og lite utprøvde grensesnitt. Dei skal lage originale historier, storyboard og produsere lyd, video, animasjonar og interaktive funksjonar. Forteljingane skal bygge på innsikter frå modul 1, og vere laga til eksplisitte målgrupper. Arbeidet føregår i grupper som vert laga av faglærarane.

Studenten skal ved avslutta emne ha følgjande læringsutbyte, definert i kunnskapar, ferdigheiter og generell kompetanse:

Kunnskap

Studenten

• har kunnskap om kvalitative og kvantitative metodar innan forsking på brukaropplevingar knytte til medieinnhald og mediedesign
• har kjennskap til sosiale teknologiar, spel og interaktive media, og brukargenerert innhald

Ferdigheiter

Studenten

• kan analysere mediebruk, brukargrupper og mediebrukstrendar i samtida
• kan identifisere utfordringar og produsere nye løysingar som betre støttar det brukarane treng
• kan nytte ulike metodar for å studere mediebruk og mediebrukarar

Generell kompetanse

Studenten

• kan formidle sentralt fagstoff knytt til brukaropplevingar innan media, både skriftleg, munnleg og gjennom andre relevante uttrykksformer
• kan utveksle synspunkt og erfaringar med fagfellar og gjennom dette bidra til utvikling av god og etisk ansvarleg praksis

• MIX101 eller INFO132
• MIX102, MIX104 eller MIX114

• Rettleiing, instruksjon/lab og workshop (om lag 6 timar per veke i 12 veker)
• Feltarbeid (om lag 100 timer i ei firevekers periode)

Obligatorisk deltaking i all organisert undervisning.

Dei obligatoriske arbeidskrava må vere godkjende før studenten kan gå opp til eksamen

Godkjende obligatoriske krav har ingen tidsavgrensing.

1. Gruppelevering: Studentane skriv ein rapport på om lag 4000 ord frå brukarevalueringa. Evalueringa skal gjere greie for bruken av både subjektive og objektive metodar (modul 1, tel 1/2).
2. Gruppelevering: Studentane lagar ein prototype og ein skriftleg spesifikasjon på om lag 1500 ord. Spesifikasjonen skal inkludere eit storyboard (modul 2, tel 1/2).