Studieprogram: MAHF-GRE Masterprogram i gresk - Vår 2023

Namn på grad

Master i gresk

Omfang og studiepoeng

Studieprogrammet har eit omfang på 120 studiepoeng og er normert til to år.

Fulltid/deltid

Eit studieprogram normert til 2 år kan etter søknad leggjast til rette for å gjennomførast på 4 år. Det er då eit deltidsstudium med 50% studieprogresjon.

Undervisningsspråk

Norsk eller anna skandinavisk språk.

Studiestart - semester

Haust. Det kan bli aktuelt å ta opp studentar også til vårsemesteret. Ta kontakt for informasjon.

Mål og innhald

Masterstudiet i gresk skal gje høve til spesialisering tufta på eit breitt og djupt oversyn over dei viktigaste fagdisiplinane, og har som føresetnad at dugleiken i gresk språk stendig vert utvida med basis i kjennskap til gresk kultur. Jamsides filologisk, språkvitskapleg og litteraturvitskapleg spesialisering, vert spesialiseringar i ulike historiske disiplinar (t.d. politisk historia, filosofihistorie, idéhistorie) godkjende i den mun oppgåva tek utgangspunkt i skriftlege kjelder på gresk.

Læringsutbyte

Kandidaten skal ved avslutta program ha følgjande læringsutbyte definert i kunnskapar, ferdigheiter og generell kompetanse:

Kunnskapar

Kandidaten..

har brei kunnskap innanfor gammalgresk språk, litteratur, historie og kultur og utdjupa kunnskapar innanfor eit avgrensa område.
har grunnleggjande kunnskap om vitskapleg teori, metode og etikk, og om de sentrale problemstillingane innanfor fagområdet.

Dugleikar

Kandidaten..

kan arbeide sjølvstendig og langsiktig med problemløysing på grunnlag av faglege kunnskapar.
kan setja seg inn i og vurdere kritisk teoriar, metodar og tolkingar innanfor fagområdet.
kan bruke aktuelle metodar til sjølvstendig forsking i tråd med gjeldande forskingsetiske normer.
kan skaffe seg og nytte kunnskap på nye område innanfor faget .
kan nytte akademisk kunnskap og relevante forskingsresultat på ein kritisk måte.

Generell kompetanse

Kandidaten..

har kompetanse til sjølvstendig å kunne halde fram med eiga kompetanseutvikling og spesialisering.
kan kommunisere med spesialistar og allmenta om faglege problemstillingar innanfor fagfeltet.
kan ta del i den offentlege debatten der denne rører ved fagområdet.
kan bruke IKT-verktøy som er naudsynte for å gjennomføra eit sjølvstendig arbeid innanfor fagområdet

Opptakskrav

Masterprogrammet i gresk byggjer på ein bachelorgrad med minst 80 studiepoeng fagleg fordjuping i gresk, eller tilsvarande.

Bachelorgrad frå UiB som kvalifiserer:

Bachelorgrad i gresk
Bachelorgrad i klassisk med spesialisering i gresk filologi

Andre bachelorgradar som kvalifiserer:

Andre bachelorgradar kan kvalifisere dersom du har minst 80 studiepoeng i gresk eller tilsvarande.

Du må også ha:

Snittkarakter på minimum C i emna du får opptak på grunnlag av.
Språkkrava i både norsk og engelsk for dette studieprogrammet dekker du med https://www.samordnaopptak.no/info/utenlandsk_utdanning/sprakkrav/krav-til-norsk-og-engelsk-for_hoyere_utdannning/index.htmlgenerell studiekompetanse, anten på grunnlag av norsk vidaregåande skule eller på annan måte.

Tilrådde forkunnskapar

Obligatoriske emne

Desse emna er obligatoriske:

GRE301 Gresk tekstpensum I (15 sp)
GRE307 Særpensum (15p)
GRE308 Gresk: Teori og metode med prosjektførebuing (15sp)
GRE350 Gresk mastergradsoppgåve (60 sp)

Tilrådde valemne

GRE303 Valemne (15 sp)
RET102 (15 sp)

ANT202 (15 sp)

LAT100 (10 sp)

ARK103 (15 sp)

KUN121 (15 sp)

FIL120 (10 sp)

FIL122 (5 sp)

HIS101 (15 sp)

HIS113 (15 sp)

HIS114 (15 sp)
LINGMET (15 sp)

Omfang masteroppgåva

Mastergradsoppgåva skal vere på mellom 70 og 110 sider.

Rekkefølgje for emne i studiet

Eit masterprogram i gresk kan sjå slik ut:

1. semester:

GRE301- Gresk tekstpensum I (15 sp)

GRE303 - Gresk valemne (15 sp)

2. semester:

GRE307 - Særpensum (15 sp)

GRE308 - Gresk: Teori og metode med prosjektførebuing (15 sp)

3. og 4. semester:

GRE350- Gresk mastergradsoppgåve (60 sp)

Krav til progresjon i studiet

Normalprogresjon er 30 studiepoeng i semesteret.

Delstudium i utlandet

Det er mogleg å ta delar av studiet ved institusjonar i utlandet. Nærare informasjon hos studierettleiar.

Arbeids- og undervisningsformer

Masterprogrammet omfattar ulike undervisningsformer; til dømes førelesing, seminar, gruppeundervisning og individuell rettleiing.

For meir detaljert informasjon, sjå emneplanen for det einskilde emnet.

Undervisningsmetodar

Masterprogrammet omfattar ulike undervisningsformer; til dømes førelesing, seminar, gruppeundervisning og individuell rettleiing.

For meir detaljert informasjon, sjå emneplanen for det einskilde emnet.

Vurderingsformer

Mastergradsoppgåve med avsluttande munnleg prøve. Skriftlege og munnlege eksamenar og semesteroppgåver.

For meir detaljert informasjon, sjå emneplanen for det einskilde emnet.

Karakterskala

Ved sensur kan det bli nytta ein av to karakterskalaer:

1) Karakterskala A-F
2) Bestått/ikkje bestått

For meir detaljert informasjon, sjå emneplanen for det einskilde emnet.

Vitnemål og vitnemålstillegg

Vitnemål blir skrive ut etter at graden er fullført.

Grunnlag for vidare studium

Studiet kan gje grunnlag for vidare ph.d.-utdanning i gresk. Dette krev gjennomgåande gode karakterar på studiet.

Relevans for arbeidsliv

Greskstudiet er ei oppøving i tolking av framande kulturuttrykk, det legg vekt på ei nøyaktig og analytisk tilnærming til stoffet og har praktisk forståing som mål. Det gjev eit godt grunnlag i alle yrke der slike eigenskapar er etterspurde, t.d. innan informasjons- og kommunikasjonsarbeid, offentleg forvalting, undervisning, reklame, journalistikk og ei rekkje former for skribent- og tekstarbeid.

Evaluering

Evaluering blir gjennomført i tråd med Universitetet i Bergen sitt kvalitetssikringssystem. Emne- og programevalueringar finn ein på kvalitetsbasen.uib.no

Programansvarleg

Programstyret for klassisk har ansvar for fagleg innhald og oppbygging av studiet og for kvaliteten på studieprogrammet.

Administrativt ansvarleg

Institutt for lingvistiske, litterære og estetiske studium

Kontaktinformasjon

studierettleiar@lle.uib.no

Søknadsprosedyre

Du søkjer opptak til Det humanistiske fakultet. Søknadsfristen er 15. april for studiestart i august. Meir informasjon om opptak og søknadsprosedyrar finn du på http://link.uib.no/?1QO0l

Mål og innhald

Fagomtale

Det greske språket er kjent gjennom skriftlege dokument heilt frå slutten av 1200-talet f. Kr. til i dag, ein eineståande lang periode. Innan faget gresk omfattar studiet på masternivå tekstar frå Homer (700-talet f. Kr.) fram til slutten på antikken (500-talet e. Kr.), men det er og mogeleg å velje tekstar skrivne på det bysantinske litteraturspråket (fram til 1453 e. Kr.).

På masternivå skal først den generelle kunnskapen om gresk litteratur frå ulike genrar og tidsperiodar aukast gjennom lesing av tekstkurs som skal veljast for å komplettere det studenten har lese tidlegare (GRE301 og 303). Det blir no stilt større krav enn på bachelornivå når det gjeld den djupare forståinga av tekstane og sjølvstendig innhenting av kunnskapar i samband med lesinga. GRE303 er eit valemne i mastergraden og kan, dersom studenten ønskjer det, bytast ut med eit teoretisk emne: LITTEHF eller LINGMET, eller med LAT101. Studentar som vel eit anna emne enn GRE303 må hugse å eksamensmelde seg i det aktuelle emne.

Andre emne, som helst skal studerast under andre semester, skal gi studenten dei kunnskapane i vitskapleg metode som trengst for å kunne skrive masteroppgåva (GRE304), gjere han/henne meir fortruleg med den tekstgruppa som masteroppgåva skal handle om og med tidlegare utforsking av tekstane (GRE305), og gjere det mogeleg å utarbeide ein prosjektskisse som skal leggjast fram til diskusjon (GRE306). Studenten skal dessutan i alle dei fire semestra som studiet varer delta i metode- og oppgåveseminar, der ein ventar at han/ho tek meir og meir aktivt del.

Arbeidet med masteroppgåva står i sentrum under studiet, og skal gjerast under individuell rettleiing (GRE350). Studenten skal her gjere bruk av og dokumentere sine greske språkkunnskapar, andre relevante forkunnskapar og sitt metodiske handlag. Temaet kan gjelde litterære tekstar, innskrifter, dokumentariske papyri osv. frå antikk eller bysantinsk periode. Problemstillinga kan vere av språk- eller litteraturvitskapleg art (eller nærme seg andre greiner av antikkvitskapen, som antikkens historie, religionshistorie, resepsjonshistorie osv.), men det er studiet av tekstar som skal vere grunnlaget.

Emneoversikt

GRE301 Gresk tekstpensum I. 15 stp Semester: Vår og Haust*. Byggjer på emne på 100- og 200 nivå.

GRE303 Valemne 15 stp.Semester: Vår og Haust. Byggjer på emne på 100- og 200 nivå.

GRE304 Metodekurs 10 stp. Semester: Haust og Vår.

GRE305 Særpensum 10 stp. Semester: Haust og Vår. Byggjer på emne på 100- og 200 nivå

GRE306 Prosjektførebuing 10 stp. Semester: Haust og Vår.

GRE350 Masteroppgåve 60 stp. Semester: Vår og haust. Byggjer på emne på 300-nivå

* Dersom ressursane tillet det.

Opptaksgrunnlag

Studiet byggjer på bachelorgrad eller tilsvarande utdanning teken i Noreg eller utlandet. Bachelorstudiet må omfatte ei spesialisering i gresk på minst 90 sp. Viss du har studert ved ein lærestad som har krav om minimum 80 sp i spesialisering/fordjuping, kan dette bli akseptert som opptaksgrunnlag. Studentar som ønskjer å søkje opptak til masterprogram i gresk på anna grunnlag enn det som er oppgitt å vere godkjent spesialisering i gresk (sjå studieplanen for det aktuelle faget), må søkje om godkjenning på førehand, seinast innan 15. mars. Slike søknader må innehelde karakterutskrift/vitnemål, pensumliste og beskriving av dei emna søkjaren meiner skal erstatte ei ordinær spesialisering. Ei eventuell godkjenning må leggjast ved søknaden til masterprogrammet.

Metode

Filologiske studiar av tekstar på originalspråket er sjølve grunnlaget. Det kan gjelde litterære eller faglitterære tekstar, innskrifter, historiske dokument osv. Men ettersom dei problema som masteroppgåva er konsentrert om kan vere av språkvitskapleg, litteraturvitskapleg, historisk, religionshistorisk, resepsjonshistorisk (osv.) karakter, blir også andre metodar relevante.

Masteroppgåve

Masteroppgåva skal vere eit sjølvstendig arbeid som viser forståing, refleksjon og modning. Oppgåva skal vise at du kan arbeide med og tolke eit tekstleg kjeldemateriale, er fortruleg med vitskapleg metode og at du meistrar litteratursøking og bruk av forskingslitteratur og tekstbasar. Arbeidet med masteroppgåva står i sentrum under studiet og skal utførast under individuell rettleiing. Du skal her gjere bruk av og dokumentere greske språkkunnskapar, andre relevante forkunnskapar og metodisk handlag. Temaet kan gjelde litterære tekstar, innskrifter, dokumentariske papyri osv. frå antikk eller bysantinsk periode. Problemstillinga kan vere av språk- eller litteraturvitskapleg art (eller nærme seg religionshistorie, resepsjonshistorie osv.), men det er studiet av tekstar som skal vere grunnlaget.

Oppbygging av studiet

Eit masterprogram i gresk kan sjå slik ut:

1. semester:

GRE301- Gresk tekstpensum I 15 sp

GRE303- Gresk valemne 15 sp

2. semester:

GRE304- Metodekurs 10 sp

GRE305- Særpensum 10 sp

GRE306- Prosjektførebuing 10 sp

3. og 4. semester:

GRE350- Masteroppgåve 60 sp

sp= studiepoeng

Fageining og spesialisering

Det krevst at ein i bachelorgraden har teke 90 studiepoeng i gresk, blant dei alle emna på 100-nivå (GRE101 - 104) eller tilsvarande godkjende emne, og to valfrie emne på 200-nivå (GRE202-254).

Oppstart

Haust. Det kan bli aktuelt å ta opp studentar også til vårsemesteret.

Ta kontakt for informasjon.

Planforslag

Normert studietid er fire semester fulltidsstudium.

Progresjonstabell med start i vårsemester:

1. semester: GRE301 + GRE303

2. semester: GRE304 + GRE305 + GRE306

3. semester: Masteroppgåve

4. semester: Masteroppgåve

Progresjonstabell med start i haustsemester:

1. semester: GRE304 + GRE305 + GRE306

2. semester: GRE301 + GRE303

3. semester: Masteroppgåve

4. semester: Masteroppgåve

Meir informasjon

studere.uib.no/sprak
studierettleiar@lle.uib.no / 55 58 23 95